ભોપાલ, કોંગ્રેસે ગુરુવારે મોડી રાત્રે મધ્યપ્રદેશ વિધાનસભા ચૂંટણી માટે ૮૮ ઉમેદવારોની બીજી યાદી જાહેર કર્યા પછી, ટિકિટો રદ થવાને કારણે નારાજ દાવેદારોએ તેમનો વિરોધ વધુ તીવ્ર બનાવ્યો છે.
મધ્યપ્રદેશ વિધાનસભા ચૂંટણી માટે કોંગ્રેસે અત્યાર સુધીમાં ૨૩૦ માંથી ૨૨૯ ઉમેદવારોને મેદાનમાં ઉતાર્યા છે. કોંગ્રેસે બેતુલ જિલ્લાની આમલા સીટ માટે પોતાના ઉમેદવારની જાહેરાત કરી નથી. પાર્ટી અહીંથી ડેપ્યુટી કલેક્ટર નિશા બાંગરેને ઉમેદવાર બનાવી શકે છે. મામલો કોર્ટમાં છે કારણ કે બાંગરેનું રાજીનામું સ્વીકારવામાં આવ્યું નથી. ગુરુવારે મોડી રાત્રે ત્રણ ઉમેદવારોની ટિકિટ બદલવાની સાથે કોંગ્રેસે ૮૮ નામોની બીજી યાદી જાહેર કરી હતી. આ પછી ઘણી જગ્યાએ બળવો શરૂ થયો. ટિકિટો રદ થવાથી નારાજ દાવેદારોએ જાવરા, બુરહાનપુર, રીવા, સિવની માલવા, સેમરિયામાં વિરોધ પ્રદર્શન કર્યું. અહીં કોંગ્રેસ કાર્યાલય સામે પુતળાનું દહન કરવામાં આવ્યું હતું. કાર્યકરોના બળવાખોર વલણના કારણે ચૂંટણીમાં કોંગ્રેસને નુક્સાન થઈ શકે છે. સાથે જ પાર્ટીએ ડેમેજ કંટ્રોલ પણ શરૂ કરી દીધો છે. બીજી યાદી બહાર આવ્યા બાદ મધ્યપ્રદેશ મહિલા કોંગ્રેસ ઉપાધ્યક્ષ કવિતા પાંડેએ પાર્ટીના તમામ હોદ્દા પરથી રાજીનામું આપી દીધું છે. કવિતા પાંડેએ સોશિયલ મીડિયા પર પોસ્ટ કરીને લખ્યું કે હું મારી જાતને કોંગ્રેસ પાર્ટીની તમામ પોસ્ટથી મુક્ત કરું છું. આભાર. કવિતા પાંડે રીવાથી ટિકિટનો દાવો કરી રહી હતી. પાર્ટીએ રાજેન્દ્ર શર્માને રીવા શહેરથી ટિકિટ આપી છે.
કોંગ્રેસની બીજી યાદી જાહેર થયા બાદ કાર્યકરોએ રાત્રે જ જાવરામાં કોંગ્રેસના ઉમેદવાર હિંમત શ્રીમલનું પૂતળું દહન કર્યું હતું. અહીંથી વિરેન્દ્ર સોલંકી અને ડીપી મજબૂત દાવા કરી રહ્યા હતા. કોંગ્રેસના કાર્યકરોએ સૂત્રોચ્ચાર કર્યા હતા અને ટોચના નેતૃત્વ પાસે ટિકિટ બદલવાની માંગ કરી હતી. જ્યારે રતલામ ગ્રામીણમાં કોંગ્રેસે લક્ષ્મણ સિંહ દિનદૌરને ઉમેદવાર જાહેર કર્યા છે. કોંગ્રેસના નેતાઓ તેમને બહારના વ્યક્તિ કહીને વિરોધ કરી રહ્યા છે.કોંગ્રેસે બુરહાનપુરથી અપક્ષ ધારાસભ્ય ઠાકુર સુરેન્દ્ર સિંહ શેરાને ટિકિટ આપી છે. અહીં લઘુમતી ઉમેદવાર જાહેર કરવાની માંગ કરવામાં આવી હતી, પરંતુ કોંગ્રેસે શેરા પર વિશ્ર્વાસ વ્યક્ત કર્યો છે. જેના વિરોધમાં કોંગ્રેસના કાર્યકરોએ રાત્રે જ શેરાના પૂતળાનું દહન કર્યું હતું.
કોંગ્રેસે નર્મદાપુરમના સિવની માલવામાં અજય બલરામને પોતાના ઉમેદવાર બનાવ્યા છે. પૂર્વ ધારાસભ્ય ઓમપ્રકાશ રઘુવંશી અહીં દાવો કરી રહ્યા છે. કોંગ્રેસની યાદી બહાર આવતાં મોડેથી રઘુવંશીના સમર્થકોએ સૂત્રોચ્ચાર કર્યા હતા. કાર્યકરોએ પાર્ટીના નિર્ણયને ખોટો ગણાવીને ટિકિટ પાછી ખેંચવાની માંગ કરી હતી. જો તેમ નહીં કરે તો ગંભીર પરિણામો ભોગવવા પડશે તેવી ચેતવણી પણ આપી હતી.કોંગ્રેસે રીવા જિલ્લાની સેમરિયા સીટ માટે અભય મિશ્રાને પોતાનો ઉમેદવાર બનાવ્યો છે. અભ્યા મિશ્રા થોડા સમય પહેલા જ ભાજપમાં જોડાયા હતા. તેમણે ભાજપમાંથી રાજીનામું આપ્યું છે, પરંતુ હજુ સુધી કોંગ્રેસનું સભ્યપદ લીધું નથી. આ પહેલા પણ પાર્ટીએ તેમને બીજી યાદીમાં ઉમેદવાર બનાવ્યા હતા. પક્ષ છોડનારાઓને ટિકિટ આપવાને લઈને સ્થાનિક કાર્યકરોમાં નારાજગી છે.