મોરવા હડફ તાલુકામાં આવેલા વાસદેલીયા ગામે એક રહેણાંક મકાનમાં વીજ વાયરમાં સર્કિટ થવાથી આગ ભભૂકી ઉઠી હતી. જેના કારણે ઘરમાં રહેલી ઘરવખરી તથા ઘરની તિજોરામાં મૂકી રાખેલ સોના ચાંદીના દાગીના અને અગત્યના ડોક્યુમેન્ટ સળગીને ખાખ થઈ ગયા હતા. જ્યારે સ્થાનિક લોકોની મદદ અને પાણીના છંટકાવના લીધે આગ ઉપર કાબુ મેળવવામાં આવ્યો હતો. શોર્ટ સર્કિટના કારણે આગના બનાવને લીધે મોરવા હડફ પોલીસ મથકે જાણવા જોગ ફરિયાદ દાખલ કરવામાં આવી હતી.
આ બનાવ સંદર્ભમાં મોરવા હડફ તાલુકાના વાંસદેલીયા ગામે આવેલા પાણી વેલીયા ફળિયામાં રહેતા લક્ષ્મણસિંહ સબુરભાઈ બારીયા એ પોતાની જાણવા જોગ પોલીસ ફરિયાદમાં જણાવેલ કે ગઈકાલે તેમના મકાનમાં વાયરના શોર્ટ સર્કિટના લીધે એકાએક આગ ભભૂકી ઊઠી હતી. જેથી ઘરમાં રહેલા તમામ સભ્યો ઘરની બહાર દોડી આવ્યા હતા. જ્યારે આસપાસના સ્થાનિક લોકોની મદદથી આગ ઉપર કાબુ મેળવવામાં આવ્યો હતો. આગના લીધે ઘરમાં રહેલા ઘાસચારા તેમજ ઘરવખરી સરસામાન સાથે સોના ચાંદીના દાગીના અને જરૂરી ડોક્યુમેન્ટ બળીને ભસ્મ થઈ ગયા હતા.
