અમેરિકન સોશિયલ મીડિયા ઇન્ફ્લુએન્સર અને રાઇટર એશ્લે સેન્ટ ક્લેરે દાવો કર્યો છે કે તે ટેસ્લા કંપનીના માલિક ઇલોન મસ્કના દીકરાની માતા છે. ક્લેરે કહ્યું હતું કે તેણે 5 મહિના પહેલાં સિક્રેટલી આ બાળકને જન્મ આપ્યો હતો, પરંતુ સેફ્ટી અને પ્રાઇવેસીને કારણે તેણે આની જાહેરાત પહેલાં કરી ન હતી.
જો ક્લેરનો દાવો સાચો હોય તો આ મસ્કનું 13મું બાળક હશે. મસ્કને બે પત્ની અને ત્રણ ગર્લફ્રેન્ડથી 12 બાળક છે.
એશ્લે ક્લેરે સોશિયલ મીડિયા પર પોસ્ટ કર્યું-
5 મહિના પહેલાં મેં આ દુનિયામાં એક બાળકનું સ્વાગત કર્યું. મસ્ક તેના પિતા છે. મીડિયામાં આ વાતને હાઇલાઇટ કરવામાં આવી રહી છે. હું બાળકને સુરક્ષિત વાતાવરણ આપવા માગું છું. હું મીડિયાને અપીલ કરું છું કે તેઓ અમારા બાળકની પ્રાઇવેસીનો આદર કરે.
26 વર્ષીય એશ્લે સેન્ટ ક્લેર એક ઇન્ફ્લુએન્સર અને રાઇટર છે. તેણે “એલિફન્ટ્સ ઓર નોટ બર્ડ્સ” નામનું પુસ્તક લખ્યું છે. મીડિયા રિપોર્ટ્સ અનુસાર, ન્યૂયોર્કના સૌથી મોંઘા વિસ્તાર મેનહટનમાં રહેતી એશ્લે રૂઢિચુસ્ત વિચારોનું સમર્થન કરે છે. X પર તેના 1 મિલિયન ફોલોઅર્સ છે.
ડેઇલી મેઇલ અનુસાર, એશ્લે ક્લેર મેનહટનમાં એક વૈભવી એપાર્ટમેન્ટમાં રહે છે, જેનું માસિક ભાડું 12થી 15 હજાર ડોલર એટલે કે લગભગ 13 લાખ રૂપિયા છે. અહીં રહેનારા લોકોએ જણાવ્યું કે એશ્લે તે શરૂઆતી લોકોમાંથી હતી, જેમની પાસે ટેસ્લા સાયબર ટ્રક હતી.
મસ્ક ગયા વર્ષે તેના 12મા બાળકનો પિતા બન્યો હતો
આ દાવા પર ઈલોન મસ્કે હજુ સુધી કોઈ નિવેદન આપ્યું નથી. મસ્ક હાલમાં ન્યુરાલિંકના મેનેજર શિવોન જિલિસલ સાથે સંબંધમાં છે. બંનેને ત્રણ બાળક છે. તે ગયા વર્ષે જ તેના 12મા બાળકનો પિતા બન્યો.
મસ્કે પહેલા લગ્ન 2000માં કેનેડિયન લેખિકા જસ્ટિન વિલ્સન સાથે કર્યા હતા. તેનો પહેલો દીકરો, નેવાડા, 2002માં જન્મ્યો હતો અને જ્યારે તે દસ અઠવાડિયાંનો હતો ત્યારે ઇન્ફેન્ટ ડેથ સિન્ડ્રોમથી મૃત્યુ પામ્યો. તેણે 2008માં વિલ્સન સાથે છૂટાછેડા લીધા.
મસ્કે કહ્યું હતું – દુનિયામાં ઓછી વસતિનું સંકટ છે ઇલોને 2010માં બ્રિટિશ સ્ટાર તલ્લુલાહ રાયલી સાથે લગ્ન કર્યા. જોકે 2012માં તેમના છૂટાછેડા થઈ ગયા. આ પછી તેણે ફરીથી લગ્ન કર્યા. ડિસેમ્બર 2014માં તલ્લુલાહે બીજી વખત છૂટાછેડા માટે અરજી કરી, પરંતુ એ પછીના વર્ષે અરજી પાછી ખેંચી લીધી. માર્ચ 2016માં તલ્લુલાહે ત્રીજી વખત છૂટાછેડા માટે અરજી કરી અને છૂટાછેડા લીધા. આ દંપતીને કોઈ બાળકો નથી.
મસ્ક માને છે કે વિશ્વ હાલમાં વસતિ સંકટનો સામનો કરી રહ્યું છે અને ઉચ્ચ IQ ધરાવતા લોકોએ બાળકો પેદા કરવા જોઈએ. તેમણે 2021માં કહ્યું હતું કે જો લોકો વધુ બાળકો પેદા નહીં કરે તો આપણી સભ્યતાનો અંત આવશે.