ઇસ્લામાબાદ,હવે પાકિસ્તાનની રાજનીતિમાં બે મહિલાઓ વચ્ચે નવી હરીફાઈ થઈ રહી છે. પૂર્વ વડાપ્રધાન ઈમરાન ખાનની પત્ની બુશરા બીબી હવે પાકિસ્તાન મુસ્લિમ લીગ નવાઝના ઉપાધ્યક્ષ મરિયમ નવાઝ સામે ફોજદારી કેસ દાખલ કરવા જઈ રહી છે.
મરિયમ પૂર્વ વડાપ્રધાન નવાઝ શરીફની પુત્રી અને વર્તમાન વડાપ્રધાન શાહબાઝ શરીફની ભત્રીજી છે. મરિયમ ઘણા મહિનાઓથી આરોપ લગાવી રહી છે કે જ્યારે ઈમરાન વડાપ્રધાન હતા ત્યારે માત્ર બુશરા બીબી જ સરકારી કોન્ટ્રાક્ટ મેળવવાના નામે પૈસા પડાવતી હતી અને તેના તમામ પુરાવા છે. બુશરા ખાનની ત્રીજી પત્ની છે. પાકિસ્તાનમાં તે પિંકી પીરની તરીકે વધુ ઓળખાય છે.
મરિયમ નવાઝે આરોપ લગાવ્યો છે કે જ્યારે ઈમરાન પીએમ હતા ત્યારે બુશરાએ ગેરકાયદેસર રીતે કરોડો રૂપિયા કમાયા હતા. તે ટ્રાન્સફર-પોસ્ટિંગ માટે પણ મોટી રકમ લેતી હતી.
મરિયમે તાજેતરમાં એક રેલીમાં કહ્યું હતું – આપણા દેશના લોકોને કેટલા પુરાવા જોઈએ છે? દરેક ગુના માટે પુરાવા છે. ઓડિયો અને વિડિયો પણ છે. શું એ સાચું નથી કે તોશાખાના (સરકારી તિજોરી)ની ભેટ બુશરાના કહેવા પર જ દુબઈમાં વેચવામાં આવી હતી. બિલ્ડરે બુશરાને જ હીરાની વીંટી કેમ ભેટમાં આપી? કેવી રીતે અચાનક બુશરાના પૂર્વ પતિ, બહેન અને પુત્રોના ખાતામાં કરોડો રૂપિયા આવવા લાગ્યા? ટ્રાન્સફર અને પોસ્ટિંગના નામે કોણે કરોડોની કમાણી કરી?
મરિયમના આ આરોપો પર ઈમરાનની પાર્ટી પાકિસ્તાન તહરીક-એ-ઈન્સાફ નારાજ થઈ ગઈ છે. તેને બચાવ કરવામાં મુશ્કેલી પડી રહી છે. તેનું કારણ એ છે કે તમામ મીડિયા ચેનલો પાસે આ આરોપોના પુરાવા અને બુશરાના બેંકિંગ વ્યવહારોની વિગતો પણ છે.
જોકે, ઈમરાનના નજીકના મિત્ર અને તેમની પાર્ટીના વરિષ્ઠ સભ્ય ફવાદ ચૌધરીએ મંગળવારે પ્રેસ કોન્ફરન્સ કરી હતી. કહ્યું- બુશરા બીબી હાઉસવાઇફ છે. તેમને રાજકારણ સાથે કોઈ લેવાદેવા નથી. મરિયમના આરોપો ખોટા છે. બુશરા હવે મરિયમ સામે ફોજદારી કેસ દાખલ કરશે. બુશરા વતી મરિયમને કાનૂની નોટિસ મોકલવામાં આવી છે.