જયપુર, અશોક ગેહલોતની હકાલપટ્ટી બાદ રાજેન્દ્ર ગુડાએ નારાજગી વ્યક્ત કરી હતી. તેમણે કહ્યું કે અમે ગેહલોત સરકારને બચાવવામાં મદદ કરી. હું બસપાની ટિકિટ પર ચૂંટણી લડ્યો અને પછી કોંગ્રેસમાં ભળી ગયો. મેં ગઈકાલે જ અન્યાય સામે વાત કરી હતી, તે સચિન પાયલટના સમર્થક હોવાની વાત નથી. મને સાચું બોલવાની સજા મળી છે.
તેમણે કહ્યું કે અમે પરીક્ષા અને પેપર લીક અંગે કંઈ કરી શક્યા નથી. આ રાજ્યના યુવાનો નિરાશ છે. ઉલ્લેખનીય છે કે, રાજસ્થાનના મુખ્યમંત્રી અશોક ગેહલોતે શુક્રવારે રાત્રે રાજ્યના મંત્રી રાજેન્દ્ર ગુડાને બરતરફ કર્યા હતા. રાજભવનના પ્રવક્તાએ આ જાણકારી આપી.
ગુડાએ શુક્રવારે વિધાનસભામાં મહિલાઓ પર અત્યાચારના મુદ્દે પોતાની જ સરકારને ઘેર્યાના થોડા કલાકો બાદ આ કાર્યવાહી થઈ છે. રાજભવનના પ્રવક્તાએ કહ્યું કે રાજ્યપાલે ગુડાને બરતરફ કરવા અંગેની મુખ્યમંત્રીની ભલામણને તાત્કાલિક અસરથી સ્વીકારી લીધી છે. અગાઉ એક સત્તાવાર સૂત્રએ જણાવ્યું હતું કે, રાજેન્દ્ર ગુડાને મંત્રી પદ પરથી હટાવી દેવામાં આવ્યા છે.
ગુડાએ મહિલાઓની સુરક્ષા અને તેમના પર થતા અત્યાચારના મુદ્દે પોતાની જ સરકાર પર સવાલ ઉઠાવ્યા હતા. રાજસ્થાન વિધાનસભામાં રાજસ્થાન લઘુત્તમ આવક ગેરંટી બિલ ૨૦૨૩ પર ચર્ચા દરમિયાન કોંગ્રેસના ધારાસભ્યોએ મણિપુરમાં હિંસાના મુદ્દા પર પ્લેકાર્ડ લહેરાવ્યા.
પોતાની જ સરકાર પર સવાલો ઉઠાવતા ગુડાએ કહ્યું કે, રાજસ્થાનમાં એ હકીક્ત છે કે અમે મહિલાઓની સુરક્ષામાં નિષ્ફળ ગયા છીએ અને રાજસ્થાનમાં જે રીતે મહિલાઓ પર અત્યાચાર વધ્યા છે તે મણિપુરને બદલે આપણે પોતાના ગળામાં જોવું જોઈએ.
આ અંગે વિપક્ષના નેતા રાજેન્દ્ર રાઠોડે જણાવ્યું હતું કે મહિલાઓ વિરુદ્ધ અપરાધના મામલામાં રાજસ્થાન નંબર વન પર છે. રાઠોડે બાદમાં એક ટ્વીટમાં કહ્યું, “સરકારના મંત્રી રાજેન્દ્ર ગુડા પોતે રાજસ્થાનમાં બહેનો અને દીકરીઓ પર થઈ રહેલા અત્યાચાર અને દુષ્કર્મની વાસ્તવિક્તા જણાવી રહ્યા છે. બંધારણની કલમ ૧૬૪(૨) મુજબ કેબિનેટ સામૂહિક જવાબદારીના આધારે કામ કરે છે અને મંત્રીનું નિવેદન સમગ્ર કેબિનેટ એટલે કે સરકારનું નિવેદન માનવામાં આવે છે.પદ પરથી હટાવવામાં આવ્યા બાદ ગુડાએ પત્રકારોને જણાવ્યું હતું કે તેમને સાચું બોલવા બદલ સજા કરવામાં આવી છે. તેમણે કહ્યું, “મહિલાઓ વિરુદ્ધ અપરાધમાં રાજસ્થાન નંબર વન છે. મેં શું ખોટું કહ્યું? મને સાચું બોલવા બદલ સજા કરવામાં આવી હતી.” ભાજપના રાજ્યસભાના સભ્ય કિરોરી મીનાએ કહ્યું કે ગુડાએ વિધાનસભામાં સાચું કહ્યું છે.
તેમણે કહ્યું, “રાજસ્થાનમાં કાયદો અને વ્યવસ્થા કથળી ગઈ છે અને મહિલાઓ વિરુદ્ધના ગુનાઓમાં અનેકગણો વધારો થયો છે. મંત્રીએ કહ્યું જે સાચું છે. ગુડા પાસે સૈનિક કલ્યાણ (સ્વતંત્ર હવાલો), હોમગાર્ડ અને નાગરિક સંરક્ષણ (સ્વતંત્ર હવાલો), પંચાયતી રાજ અને ગ્રામીણ વિકાસનો પોર્ટફોલિયો હતો.