મહીસાગર,ગુજરાત માધ્યમિક અને ઉચ્ચતર માધ્યમિક શિક્ષણબોર્ડ, ગાંધીનગર ધ્વારા ગુજકેટની જાહેર પરીક્ષા તા. 31/03/2024ના રોજ મહીસાગર જીલ્લાના લુણાવાડા ખાતે પરીક્ષા કેન્દ્રો/બિલ્ડીંગો ઉપર લેવાનાર છે. જે અંતર્ગત મહીસાગર અધિક જીલ્લા મેજીસ્ટ્રેટ સી.વી.લટા દ્વારા પરીક્ષા કેન્દ્રની આસપાસ 144 લાગુ કરવા તેમજ પરીક્ષા સમય દરમિયાન ઝેરોક્ષ મશીન બંધ રાખવાનું જાહેરનામું પ્રસિધ્ધ કરવામાં આવ્યું.
તા.31/03/2024ના રોજ સવારના 8-00 કલાકે થી સાંજના 18-00 કલાક સુધીના સમયગાળા માટે અનૂસૂચિત પરીક્ષા કેન્દ્રની ચર્તુદિશાની ચોતરફ 100 મીટરની ત્રિજ્યામાં આવેલ તમામ મકાનો,જગ્યા, સ્થળ અને વિસ્તારમાં ચાર માણસોએ એકઠા થવું નહી/મંડળી ભરવી નહી તેમજ અધિકૃત અધિકારીઓ, કર્મચારીઓ તથા પરીક્ષાર્થીઓ સિવાય કોઇ પણ ઇસમને પરીક્ષા કેન્દ્રની ચર્તુદિશાની ચોતરફ 100 મીટરની ત્રિજ્યામાં પ્રવેશ કરવા પર પ્રતિબંધ ફરમાવવામા આવે છે.
પરીક્ષાર્થી ઉમેદવાર અને પરીક્ષા સંબંધિત કામગીરીમાં રોકાયેલા ફરજ પરના અધિકૃત માણસો સિવાય અન્ય કોઇ બિનઅધિકૃત વ્યક્તિઓએ અવર-જવર કરવી નહિ. કાયદેસરની ફરજ બજાવનારાઓને કોઇપણ પ્રકારે અડચણ કે અવરોધ કરવો કે કરાવવો, તેમજ કોઇપણ ઇસમે કોઇપણ પ્રકારની તરકીબ વાપરી પરીક્ષાર્થીઓને પરીક્ષા વિષયક ચોરી કરવા /કરાવવામાં સીધી કે આડકતરી મદદગારી કરવી કે કરાવવા ઉપર, પરીક્ષાર્થી ઉમેદવારોની શાંતિ અને લેખનકાર્યમાં અડચણ- વિક્ષેપ-ધ્યાનભંગ થાય તેવુ કોઇ કૃત્ય કરવું/કરાવવા ઉપર, પરીક્ષાર્થીઓ, શિક્ષકો, સંચાલકો, વહીવટી કર્મચારીઓ, જાહેર જનતા કે ફરજ પરના તમામ સ્ટાફએ પરીક્ષા સબંધી ચોરી કરી શકાય તેવી કોઇ વસ્તુ, અથવા ઇલેકટ્રોનીક આઇટમ જેવી કે મોબાઇલ ફોન, કેમેરા, સ્માર્ટવોચ, સ્માર્ટબેન્ડ, લેપટોપ, કોમ્યુટર, કેલ્ક્યુલેટર, બ્લુટૂથ, ઈયરફોન તથા તેવા બીજા ઇલેકટ્રોનિકસ ગેઝેટસ/ઉપકરણોના ઉપયોગ કરવા તથા પુસ્તકો, કાપલીઓ, ઝેરોક્ષ નકલો કે પરીક્ષાલક્ષી કોઇપણ પ્રકારનું સાહિત્ય પરીક્ષાના દિવસે પરીક્ષા ખંડમાં લઇ જવા, વહન કરવા કે તેમાં મદદગારી કરવા ઉપર પ્રતિબંધ ફરમાવામાં આવે છે.
આ ઉપરાંત પરીક્ષાખંડમાં શાંતિપૂર્ણ રીતે પરીક્ષાર્થીઓને, અન્ય કોઇ વ્યક્તિ અથવા જાતે પરીક્ષામાં ચોરી કરવી કે, કરાવવી, તે પ્રકારના કામમાં મદદગારી કરવી તેમજ પરીક્ષાલક્ષી કોઇપણ પ્રકારના સાહિત્યની આપ-લે કરવી કે કરાવવા ઉપર, પરીક્ષામાં થતી ગેરરીતિ અટકાવવાના હેતુથી ઉપર મુજબના પરીક્ષા કેન્દ્રો વિસ્તારમાં આવેલ ઝેરોક્ષ કોપી સેન્ટર, ઝેરોક્ષ કોપીઅર મશીન, ફેક્સ મશીન સંચાલકોએ કોપીઅર મશીનનો ઉપયોગ પરીક્ષાના દિવસ દરમ્યાન સવારના 8-00 કલાક થી 18-00 કલાક સુધી સદંતર બંધ રહેશે, પરીક્ષા કેન્દ્રની આજુબાજુ બિનજરૂરી ટોળા ભેગા થવા પર, કોઇ અનઅધિકૃત વ્યક્તિ પરીક્ષા કેન્દ્રમાં પ્રવેશ કરવા પર, પરીક્ષા કેન્દ્રમાં પરીક્ષા ચાલતી હોય તે સમયે પરીક્ષાને લગતી અનઅધિકૃત લેખન સામગ્રી પરીક્ષા કેન્દ્રમાં લઇ જવા પર, પરીક્ષા કેન્દ્રની આજુબાજુના વિસ્તારમાં માઇક/લાઉડ સ્પીકર/ડી.જે. સાઉન્ડ વગાડવા પર પ્રતિબંધ ફરમાવામાં આવે છે.આ જાહેરનામાનો ભંગ કરનાર અથવા ઉલ્લંઘન કરનાર ઇસમ ઇન્ડીયન પીનલ કોડની કલમ-188 હેઠળ શિક્ષાને પાત્ર થશે.