પ્રયાગરાજ, પ્રયાગરાજમાં મહિલા કોન્સ્ટેબલની રૂમમાં હત્યા બાદ આત્મહત્યા જેવી ઘટના સામે આવી છે. પરિણીત કોન્સ્ટેબલ રાજેશ અને તેની મિત્ર મહિલા કોન્સ્ટેબલ પ્રિયાના મૃતદેહ મળી આવ્યા છે. આ ઘટના શહેરના શાહગંજ પોલીસ સ્ટેશન વિસ્તારમાં રેલવે સ્ટેશન નજીક સ્થિત મિન્હાજપુર વિસ્તારમાં બની હતી.
કાનપુરની રહેવાસી ૨૦૨૦ બેચની મહિલા કોન્સ્ટેબલ પ્રિયા તિવારી છેલ્લા ઘણા દિવસોથી મિન્હાજપુર વિસ્તારમાં એક લોજમાં ભાડે રૂમ લઈને રહેતી હતી. આ દિવસોમાં પ્રિયા ટુરિસ્ટ પોલીસ સ્ટેશનમાં ફરજ બજાવી રહી હતી. આ પહેલા તે એસીપી ઓફિસમાં ફરજ બજાવતી હતી, જ્યાં પોલીસ કોન્સ્ટેબલ રાજેશ સાથે તેની મિત્રતા થઈ હતી. ૨૦૧૯ બેચનો રાજેશ યુપીના મથુરા જિલ્લાનો રહેવાસી હતો. આ દિવસોમાં રાજેશ પણ એસીપી ઓફિસમાં પ્રોડક્શન ડ્યુટી પર હતો.
પોલીસ કમિશનર રમિત શર્માના જણાવ્યા અનુસાર, ભાડાના રૂમમાંથી મહિલા કોન્સ્ટેબલ પ્રિયા અને પુરુષ કોન્સ્ટેબલ રાજેશના મૃતદેહ શંકાસ્પદ હાલતમાં મળી આવ્યા હતા. તેમના કહેવા મુજબ રાજેશની લાશ લટક્તી હતી, જ્યારે પ્રિયાની લાશ બેડ પર પડી હતી. રાજેશે આત્મહત્યા કરી હોવાનું કહી શકાય, પરંતુ પ્રિયાનું મોત કેવી રીતે થયું તે હજુ સ્પષ્ટ થયું નથી.
પ્રિયાના મૃત્યુને લઈને પોલીસ સામે બે થિયરીઓ સામે આવી રહી છે. પહેલું એ કે પ્રિયાએ આત્મહત્યા કરી હોઈ શકે અને બીજી એ કે પુરુષ કોન્સ્ટેબલ રાજેશે તેની હત્યા કર્યા બાદમાં પોતાને ફાંસી લગાવીને આત્મહત્યા કરી હોઈ શકે. જોકે, બંને પોલીસકર્મીઓએ આ પગલું કેમ ભર્યું તે એક રહસ્ય છે. હાલમાં પોલીસ બંને મૃતદેહોને પોસ્ટમોર્ટમ માટે મોકલી આપ્યા છે. અને મર્ડર અને આત્મહત્યાની થિયરીઓ પર વધુ તપાસ હાથ ધરી છે.