ASSAM આસામમાં બહુપત્નીત્વને સમાપ્ત કરવા માટે કાયદો ઘડવા માટે વિધાનસભાની કાયદાકીય ક્ષમતાની ખાતરી કરવા માટે રાજ્ય સરકાર દ્વારા રચવામાં આવેલી નિષ્ણાત સમિતિએ રવિવારે મુખ્ય પ્રધાન હિમંતા બિસ્વા સરમાને પોતાનો અહેવાલ સુપરત કર્યો હતો. શર્માએ ટ્વિટર પર સમિતિ દ્વારા તેમને સોંપવામાં આવેલા અહેવાલ અને દસ્તાવેજોની તસવીરો શેર કરી છે. જો કે, આ રિપોર્ટની સામગ્રી અને ભલામણો હજુ સુધી જાહેર કરવામાં આવી નથી.
મુખ્યમંત્રીએ એમ પણ કહ્યું હતુ કે, ‘આસામ જાતિ, સંપ્રદાય અથવા ધર્મને ધ્યાનમાં લીધા વિના મહિલાઓના સશક્તિકરણ માટે હકારાત્મક વાતાવરણ બનાવવાની નજીક પહોંચી ગયું છે.’
CM હિમંતાએ કહ્યું હતું કે, ‘એક્સપર્ટ કમિટીએ આજે રાજ્ય સરકારને પોતાનો રિપોર્ટ સોંપ્યો છે. આ નાણાકીય વર્ષમાં કાયદો અમલમાં આવશે. અમે તેને વાંચવા અને ચર્ચા કરવા માટે ધારાસભ્યોને સમય આપવા માંગીએ છીએ. સમિતિએ તેના અહેવાલમાં કહ્યું છે કે, રાજ્ય સરકાર આ કાયદો બનાવવા માટે સક્ષમ છે.’
18 જુલાઈના રોજ, આસામ સરકારે સમિતિની મુદત 13 જુલાઈથી 12 ઓગસ્ટ સુધી એક મહિનો વધારી દીધી હતી. સમિતિને શરૂઆતમાં તેનો રિપોર્ટ આપવા માટે 60 દિવસનો સમય આપવામાં આવ્યો હતો. તેને બંધારણની કલમ 25 અને મુસ્લિમ પર્સનલ લૉ (શરિયત) અધિનિયમ, 1937ની સમાન નાગરિક સંહિતા માટેની રાજ્ય નીતિના નિર્દેશક સિદ્ધાંતોને લગતી જોગવાઈઓની તપાસ કરવાનું કામ સોંપવામાં આવ્યું હતું.
12 મેના રોજ, આસામના મુખ્યમંત્રીએ ન્યાયમૂર્તિ (નિવૃત્ત) રૂમી કુમારી ફુકનની અધ્યક્ષતામાં ચાર સભ્યોની નિષ્ણાત સમિતિની રચનાની જાહેરાત કરી હતી. ફુકન ઉપરાંત, સમિતિના અન્ય સભ્યોમાં રાજ્યના એડવોકેટ જનરલ દેવજીત સૈકિયા, વરિષ્ઠ એડિશનલ એડવોકેટ જનરલ નલિન કોહલી અને વરિષ્ઠ એડવોકેટ નકીબ-ઉર-ઝમાનનો સમાવેશ થાય છે.