ખેડા, રાજ્ય સરકારના રમત ગમત યુવા અને સાંસ્કૃતિક પ્રવૃત્તિઓ વિભાગ, ગાંધીનગર-પ્રેરિત ગુજરાત રાજય યોગ બોર્ડ દ્વારા રાજ્ય વ્યાપી સૂર્ય નમસ્કાર અભિયાન” અંતર્ગત તા. 01/01/2024 ના રોજ સૂર્ય નમસ્કાર કાર્યક્રમનુ આયોજન સમગ્ર રાજયમાં 108 સ્થળો પર થનાર છે. જે ગિનિસ બુક ઓફ વલ્ડ રેકોર્ડમાં સ્થાન પામશે. આ 108 આઈકોનિક સ્થળો પૈકી નડિયાદનું સ્પોર્ટ્સ કોમ્પ્લેક્સ પણ પસંદગી પામેલ છે. સ્પોર્ટ્સ કોમ્પ્લેક્સ, મરીડા ભાગોળ, નડિયાદ ખાતે તા. 01/01/2024ના રોજ સવારે 07 કલાક થી 08: 45 કલાક સુધી સુર્યનમસ્કાર માટે કાર્યક્રમ યોજાશે. જેમાં કુલ 500 સહભાગીઓ દ્વારા સુર્યનમસ્કાર કરવામાં આવશે. આ સિવાય ઉપરોક્ત દિને સંતરામ મંદિર પરીસર, નડિયાદ ખાતે પણ 100 સહભાગીઓ દ્વારા સુર્ય નમસ્કાર કરવામાં આવશે.
તા. 01/01/2024 ના રોજ ખેડા જીલ્લાના સ્પોર્ટ્સ કોમ્પ્લેક્સ, મરિડા ભાગોળ, નડિયાદ અને સંતરામ મંદિર પરિસર, નડિયાદ ખાતે યોજાનાર સૂર્ય નમસ્કાર કાર્યક્રમ સંદર્ભમાં જીલ્લા કલેકટરએ આરોગ્યની સુવિધાઓ, કનેક્ટિવિટી, લાઈવ સ્ટ્રીમીંગ, આમંત્રણ પત્રિકા, સ્થળ વ્યવસ્થાપન, પોલીસ બંદોબસ્ત, બેઠક વ્યવસ્થા, વિદ્યુત પુરવઠો સહિતની બાબતો વિશે સુચારૂ આયોજન કરી સફળ કાર્યક્રમ કરવા જરૂરી માર્ગદર્શન આપ્યું.
નોંધનીય છે કે, સુર્ય નમસ્કાર કાર્યક્રમ માટે શારદા મંદિર હાઈસ્કુલ, નડિયાદ અને જવાહર વિદ્યાલય, નડિયાદના વિદ્યાર્થીઓને સ્પોર્ટ્સ કોમ્પ્લેક્સ, મરિડા ભાગોળ, નડિયાદ ખાતે તથા સંતરામ વિદ્યાલય, નડિયાદ ના વિદ્યાર્થીઓને સંતરામ મંદિર પરીસર, નડિયાદ ખાતે તારીખ 01/01/2024 સવારે 7:00 કલાકે જે તે શાળાના કો-ઓર્ડિનેટર શિક્ષકો સાથે હાજર રહેશે.
આ મિટિંગમાં જીલ્લા પોલીસ અધિક્ષક રાજેશ ગઢીયા, ડીઆરડીએ ડાયરેક્ટર લલિત પટેલ, જીલ્લા યુવા વિકાસ અધિકારી અક્ષય મકવાણા, જીલ્લા રમત ગમત અધિકારી લક્ષ્મણ સિહ ચૌહાણ, જીલ્લા રમત વિકાસ અધિકારી મનસુખ તાવેથીયા, જીલ્લા પ્રાથમિક શિક્ષણ અધિકારી કમલેશ પટેલ સહિત સંબધિત વિભાગના અધિકારીઓ અને કર્મચારીઓ હાજર રહ્યા હતા.