પ્રતિબંધિત ખાલિસ્તાની સંગઠન શીખ ફોર જસ્ટિસના વડા ગુરપતવંત સિંહ પન્નુનો વધુ એક વીડિયો સામે આવ્યો છે, જેમાં તે ભારતના ગૃહમંત્રી અમિત શાહ અને વિદેશ મંત્રી એસ જયશંકરને નિશાન બનાવવાનો પ્રયાસ કરતા જોવા મળે છે. આતંકવાદી જીએસ પન્નુ વિડિયોમાં શાહ અને જયશંકર પર ખાલિસ્તાન તરફી આતંકવાદી હરદીપ સિંહ નિજ્જરને મારવા માટે ઉશ્કેરવા અને કાવતરું ઘડવાનો આરોપ લગાવી રહ્યો છે. આ સાથે તેમણે અમિત શાહ, વિદેશ મંત્રી એસ જયશંકર અને કેનેડામાં ભારતીય હાઈ કમિશનર સંજય કુમાર વર્માની વિદેશ યાત્રા વિશે માહિતી આપનારને ૧૨૫,૦૦૦ યુએસ ડોલરનું ઈનામ આપવાની જાહેરાત કરી છે.
ગુરપતવંત સિંહ પન્નુ છેલ્લા ઘણા સમયથી ભારતીય એજન્સીઓના નિશાના પર છે. પન્નુ ગેરકાનૂની પ્રવૃતિઓ (પ્રિવેન્શન) એક્ટ હેઠળ નેશનલ ઇન્વેસ્ટિગેશન એજન્સી (દ્ગૈંછ)ની વોન્ટેડ લિસ્ટમાં સામેલ છે. જ્યારથી કેનેડામાં આતંકવાદી હરદીપ સિંહ નિજ્જરની હત્યા થઈ છે ત્યારથી ખાલિસ્તાન સાથે જોડાયેલા ઘણા લોકો આ માટે ભારતીય રાજનેતાઓ અને હાઈ કમિશનરોને જવાબદાર ઠેરવી રહ્યા છે. નિજ્જરની ગુરુદ્વારાની બહાર અનેક ગોળીઓથી હત્યા કરવામાં આવી હતી.
ખાલિસ્તાની સંગઠન શીખ ફોર જસ્ટિસએ ફરી એકવાર ભારતીય હાઈ કમિશન અને રાજદ્વારીઓના ઘરોને ઘેરવાની જાહેરાત કરી છે. એસએફજેએ ૧૫ ઓગસ્ટના રોજ ઓટાવા, ટોરોન્ટો અને વાનકુવરમાં ખાલિસ્તાન તરફી મેળાવડાનું આહ્વાન કર્યું છે અને ૧૦ સપ્ટેમ્બરે વેનકુવરમાં મોટાપાયે શીખ જનમતની પણ જાહેરાત કરી છે.
ગૃહમંત્રી અમિત શાહ અને વિદેશ મંત્રી એસ જયશંકર વિશે માહિતી આપનાર ઈનામની જાહેરાત બાદ ગુપ્તચર એજન્સી અને તમામ એજન્સીઓ એલર્ટ પર છે. ખાલિસ્તાન સમર્થક આતંકવાદીઓની દરેક કાર્યવાહી પર નજર રાખવામાં આવી રહી છે. આને ભારતીય નેતાઓ માટે ખુલ્લા ખતરા તરીકે જોવામાં આવી રહ્યું છે. વિદેશ મંત્રી એસ જયશંકર વારંવાર વિદેશ પ્રવાસ કરે છે, જ્યારે અમિત શાહ સામાન્ય રીતે વિદેશ પ્રવાસ કરતા નથી.
કેનેડામાં ભારતીયોની સંખ્યા ઘણી વધારે છે, તેથી તેઓ એક મોટી વોટ બેંક પણ છે. એટલા માટે પક્ષથી લઈને વિપક્ષ સુધી કોઈ આ મામલે મોટું નિવેદન આપવા તૈયાર નથી. અત્યાર સુધી કેનેડાના કોઈ મોટા નેતાએ ખાલિસ્તાન સમર્થકો વિરુદ્ધ કોઈ કડક ટિપ્પણી કરી નથી. ભારતે એવો પણ આક્ષેપ કર્યો છે કે શીખ ઉગ્રવાદીઓ વિરુદ્ધ કાર્યવાહી ન કરીને કેનેડાની સરકાર વોટ બેંકને પ્રોત્સાહન આપી રહી છે.