- ભોપાલ અને છિંદવાડામાં ATSના દરોડા; જીમ ટ્રેનર, એન્જિનિયર અને શિક્ષક પણ સામેલ
ભોપાલ,મધ્યપ્રદેશ અને તેલંગાણા એટીએસની ટીમોએ સવારે ભોપાલ અને છિંદવાડામાં દરોડા પાડ્યા હતા. બંને જગ્યાએથી ૧૧ લોકોની ધરપકડ કરવામાં આવી છે. કટ્ટરપંથી ઈસ્લામિક સંગઠન હિઝબ-ઉત-તહરિર સાથે તેમના જોડાણના પુરાવા મળ્યા છે. સમગ્ર દેશમાં કુલ ૧૬ HUT સભ્યોની ધરપકડ કરવામાં આવી હતી. ભોપાલમાંથી ૧૦, છિંદવાડામાંથી ૧, તેલંગાણામાંથી ૫ સભ્યોની ધરપકડ કરવામાં આવી છે. ધરપકડ કરાયેલા લોકોમાં ભોપાલ ગેસ દુર્ઘટનાના કાર્યર્ક્તાના સંબંધીનો પણ સમાવેશ થાય છે. એન્જિનિયરોથી લઈને શિક્ષકો પણ આ સંસ્થા સાથે જોડાયેલા છે.
મધ્યપ્રદેશ ના ગૃહમંત્રી નરોત્તમ મિશ્રાએ કહ્યું કે, એમપી એટીએસએ ધરપકડ કરાયેલ એચયુટી સભ્યો પાસેથી વાંધાજનક સાહિત્ય પણ જપ્ત કર્યું છે. આ અંગે ઘણા સમયથી ઇનપુટ મળી રહ્યા હતા, ત્યારબાદ આ કાર્યવાહી કરવામાં આવી હતી. આ સંગઠન શરિયા કાયદાને લાગુ કરવા માટે કોઈપણ હદ સુધી જવા અને હિંસાનો આશરો લેવામાં માને છે.
મધ્યપ્રદેશ એટીએસએ ભોપાલમાંથી ધરપકડ કરાયેલ એચયુટીના ૧૦ સભ્યોને કોર્ટમાં રજૂ કર્યા હતા. અહીં એટીએસે તમામના રિમાન્ડ માંગ્યા હતા. રિમાન્ડ મંજૂર કરતાં કોર્ટે મામલો ૧૯ મે સુધી એટીએસને પૂછપરછ માટે સોંપ્યો છે. એટીએસ અધિકારીઓ ટૂંક સમયમાં છિંદવાડા અને હૈદરાબાદથી ધરપકડ કરાયેલા આરોપીઓને ટ્રાન્ઝિટ રિમાન્ડ પર ભોપાલ લાવશે. મધ્યપ્રદેશ પોલીસ સાથે સંકળાયેલા અધિકારીઓએ જણાવ્યું કે ધરપકડ કરાયેલા આરોપીઓ શિક્ષક, સોટવેર એન્જિનિયર, કોચિંગ શિક્ષક, ઓટો ડ્રાઈવર, કોમ્પ્યુટર ટેકનિશિયન અને વ્યવસાયે મજૂર છે.
કસ્ટડીમાં લેવામાં આવેલા શકમંદોમાં ભોપાલ ગેસ પીડિતો માટે કામ કરતી સંસ્થા ચિંગારીના સ્થાપક, રશીદા બીના સગા વસીમનો સમાવેશ થાય છે. રશીદા બીએ કહ્યું, વસીમ નિર્દોષ છે. તેણે કંઈ કર્યું નથી. પોલીસને ઘરમાં કંઈ મળ્યું ન હતું. લેપટોપ કે મોબાઈલ પણ મળ્યા ન હતા. તે ડિફરન્ટલી વિકલાંગ બાળકો માટે કામ કરતી સંસ્થામાં કામ કરે છે. તે માટે હું હાઈકોર્ટમાં જઈશ.
હિઝબ-ઉત-તહરિરનું મુખ્યાલય લંડન (યુકે)માં છે. આ સંગઠન ભારતમાં લોકશાહી શાસન વ્યવસ્થાની જગ્યાએ ઈસ્લામિક શરિયા કાયદો લાવવા માગે છે. આ માટે સંગઠને ગુપ્ત રીતે મધ્યપ્રદેશ માં પણ તેની કેડર તૈયાર કરવાનું શરૂ કરી દીધું હતું. સંસ્થાનો ઉદ્દેશ્ય ભારતની વર્તમાન શાસન વ્યવસ્થાને ઈસ્લામિક વિરોધી ગણાવીને યુવાનોને સંગઠન સાથે જોડવાનો છે. સંગઠન સાથે જોડાયેલા તમામ ધરપકડ કરાયેલા આરોપીઓ જંગલોમાં છાવણીઓ બનાવીને ગુપ્ત રીતે નિશાન બનાવવાની પ્રેક્ટિસ કરતા હતા. આ શિબિરોમાં હૈદરાબાદથી ટ્રેનર્સ આવતા હતા. ધાર્મિક સભાઓનું પણ ગુપ્ત રીતે આયોજન કરવામાં આવ્યું હતું, જેમાં ઉશ્કેરણીજનક ભાષણો અને જેહાદી સાહિત્યનું વિતરણ કરવામાં આવ્યું હતું.
પોલીસના જણાવ્યા અનુસાર, ભોપાલથી ધરપકડ કરાયેલો આરોપી સમગ્ર મધ્યપ્રદેશ માં સંગઠનને વિસ્તારવા માગતો હતો. આરોપીઓને આવા યુવાનોને સંગઠનમાં ઉમેરવાનો ટાર્ગેટ આપવામાં આવ્યો હતો, જેઓ ઉગ્ર સ્વભાવના છે. તે જ સમયે, તેઓએ પોતાનો જીવ આપવામાં કોઈ સંકોચ રાખવો જોઈએ નહીં.