કાલોલ, તાજેતરમાં જ જ્ઞાનપીઠ વિજેતા સર્જક ઉમાશંકર જોશીની જન્મ જયંતી અવસરે તેમના વિશે લોકોમાં સાહિત્યિક જાગૃતિ આવે, તેમના સાહિત્યનો પ્રચાર- પ્રસાર થાય અને સર્જકની વધુ લોકોમાં ઓળખ થાય તેવા અનેક હેતુઓને ધ્યાનમાં લઈ ગુજરાત સાહિત્ય અકાદમી ગાંધીનગર દ્વારા કુમાર આર્ટ્સ ફાઉન્ડેશન ગોધરા અને એકલવ્ય મોડેલ રેસીડેન્સીયલ સ્કૂલ વેજલપુરના સહયોગથી ઉમાશંકર જોશીની જન્મજયંતિની વેજલપુરની એકલવ્ય રેસીડેન્સીયલ સ્કૂલ ખાતે ભવ્ય ઉજવણી કરવામાં આવી હતી. આ કાર્યક્રમમાં અધ્યક્ષ તરીકે કૃષિ વિજ્ઞાન કેન્દ્ર વેજલપુરના નિયામક કનકલતાબેને સ્થાન શોભાવ્યું હતું. આ ઉજવણીમાં વક્તા તરીકે કવિ મહેન્દ્રકુમાર પરમારે સર્જક ઉમાશંકર જોશીના જીવન કવન અને તેમના સાહિત્યને વણી સમાજમાં ધૂમ મચાવતા પ્રચલિત સંસ્કૃતિ વિહીન ગીતોના સ્થાને ઉમાશંકર જોશી અને બીજા અનેક સુજ્ઞ સર્જકોના સંસ્કૃતિ પોષક ગીતો, કાવ્યોને સ્થાન આપવા અનુરોધ કર્યો હતો.
દરમ્યાન વિસ્તારના જાણીતા ગાયક કલાકાર કિન્નરી સૌરભ સોની અને ગોપાલભાઈ પટેલે ઉમાશંકર જોશીના જીવન કવન અને તેમના કાવ્યોને સંગીત સાથે રજૂ કરી વાતાવરણ કવિ ઉમાશંકર જોશીમય બનાવ્યું હતું. આ કાર્યક્રમનું સંયોજન અને આયોજન કુમાર આર્ટ્સ ફાઉન્ડેશન ગોધરાના અધ્યક્ષ અને જાણીતા સર્જકકુમાર જૈમિનિ શાસ્ત્રીએ કર્યું હતું. આ કાર્યક્રમમાં સ્કૂલના આચાર્ય ભદ્રેશભાઈ સુથાર અને શાળાના તમામ શિક્ષકો, મોટી સંખ્યામાં વિદ્યાર્થીઓ અને સાહિત્યપ્રેમી લોકોએ હાજરી આપી હતી. કાર્યક્રમમાં ઉમાશંકર જોશીની કવિતાઓ, તથા અન્ય સર્જન વિશે માહિતી આપવામાં આવી હતી. તેમની પ્રસિદ્ધ કવિતાઓનું પઠન અને ગાન કરીને ઉજવણીને વધુ રોચક બનાવવામાં આવી હતી. ડો. જે.એન. શાસ્ત્રીએ ઉમાશંકર જોશી વિશે અનેક સાહિત્યિક ટિપ્પણીઓ અને સાહિત્ય વિમર્શ રજૂ કરીને ઉજવણીમાં રંગ જમાવ્યો હતો.