જમ્મુ-કાશ્મીરમાં આતંકવાદીઓના વધતા પડકાર વચ્ચે સુરક્ષાદળોએ કાર્યવાહી કરી. કુપવાડા જિલ્લામાં બે અલગ-અલગ એક્ધાઉન્ટરમાં ઓછામાં ઓછા ત્રણ આતંકવાદીઓ માર્યા ગયા છે. ભારતીય સેનાના ચિનાર કોર્પ્સે આ જાણકારી આપી છે. તેમના જણાવ્યા અનુસાર, કુપવાડાના માછિલ સેક્ટરમાં એક એન્કાઉન્ટર માં સુરક્ષા દળોએ બે આતંકવાદીઓને ઠાર માર્યા હતા. તે જ સમયે કુપવાડાના તંગધાર સેક્ટરમાં વધુ એક આતંકવાદી માર્યો ગયો.
જણાવી દઈએ કે ૨૮-૨૯ ઓગસ્ટની મયરાત્રિએ તંગધાર સેક્ટરમાં આતંકવાદીઓ નજરે પડ્યા બાદ સુરક્ષાદળોએ મોટું સર્ચ ઓપરેશન શરૂ કર્યું હતું. આ દરમિયાન માછિલ સેક્ટરમાં પણ ઓપરેશન હાથ ધરવામાં આવ્યું હતું. ૫૭ રાષ્ટ્રીય રાઈફલ્સના જવાનોએ વિસ્તારમાં બેથી ત્રણ આતંકવાદીઓને જોયા હતા. વધુમાં, રાજૌરી જિલ્લામાં સુરક્ષા દળો અને આતંકવાદીઓ વચ્ચે ત્રીજી અથડામણ થઈ. અહીં ત્રણથી ચાર આતંકવાદીઓ છુપાયા હોવાની આશંકા હતી.
ભારતીય સેનાના ચિનાર કોર્પ્સે ટ્વિટર પર એક પોસ્ટમાં જણાવ્યું હતું કે, “ઘૂસણખોરીની સંભાવના વિશે ગુપ્ત માહિતીના આધારે કાર્યવાહી કરીને, ભારતીય સેના અને જમ્મુ અને કાશ્મીર પોલીસે કુપવાડાના તંગધાર વિસ્તારમાં ૨૮-૨૯ ઓગસ્ટની રાત્રે એક ઓપરેશન શરૂ કર્યું હતું.” આમાં કોઈ આતંકવાદી માર્યા જવાની શક્યતા છે. તેમણે અન્ય પોસ્ટમાં જણાવ્યું હતું કે, “ભારતીય સેના અને જમ્મુ અને કાશ્મીર પોલીસે ૨૮-૨૯ ઓગસ્ટની રાત્રે કુપવાડાના માછિલ સેક્ટરમાં સંયુક્ત ઓપરેશન શરૂ કર્યું હતું. ખરાબ હવામાનમાં શંકાસ્પદ પ્રવૃત્તિ જોવા મળી હતી અને અમારા સૈનિકો દ્વારા ગોળીબાર કરવામાં આવ્યો હતો.
જમ્મુ અને કાશ્મીરના રાજૌરી જિલ્લામાં બુધવાર અને ગુરુવારની વચ્ચેની રાત્રે કોર્ડન અને સર્ચ ઓપરેશન દરમિયાન સુરક્ષા દળો અને આતંકવાદીઓ વચ્ચે અથડામણ થઈ હતી. અધિકારીઓએ આ માહિતી આપી છે પોલીસ પ્રવક્તાએ જણાવ્યું હતું કે, “સુરક્ષા દળોએ બુધવારે રાત્રે ૯.૩૦ વાગ્યે રાજૌરી જિલ્લાના ખેરી મોહરા લાઠી અને દંથાલ ગામોમાં સર્ચ ઓપરેશન શરૂ કર્યું હતું.”
પ્રવક્તાએ કહ્યું કે સર્ચ ઓપરેશન દરમિયાન લગભગ ૧૨ વાગ્યાની આસપાસ આતંકવાદીઓની ઓળખ કરવામાં આવી હતી. તેમણે કહ્યું કે આ પછી ખેરી મોહરા વિસ્તાર પાસે આતંકવાદીઓ અને સુરક્ષા દળો વચ્ચે ગોળીબાર શરૂ થયો. અધિકારીઓએ જણાવ્યું કે કોર્ડન કરેલા વિસ્તારમાં બેથી ત્રણ આતંકવાદીઓ છુપાયેલા છે. તેમણે કહ્યું કે કોર્ડન અને સર્ચ ઓપરેશનને મજબૂત કરવા માટે વધારાના સુરક્ષા દળોને વિસ્તારમાં મોકલવામાં આવ્યા છે.વિલેજ ડિફેન્સ ગાર્ડ્સના એક જૂથે સોમવારે રાત્રે રાજૌરી જિલ્લાના મીરા-નગરોટા ગામમાં એક ઘર પાસે બે અજાણ્યા લોકોને જોયા અને હવામાં ગોળીબાર કર્યો. આ પછી સુરક્ષા દળોએ વિસ્તારમાં સર્ચ ઓપરેશન શરૂ કર્યું હતું.