નવીદિલ્હી, કોરોના પીરિયડ પછી દેશમાં રિયલ એસ્ટેટ સેક્ટરમાં તેજી આવી છે. રિયલ એસ્ટેટ સેક્ટરમાં ગ્રોથ નોંધાઈ રહ્યો છે. હાલમાં જ રિયલ એસ્ટેટ કંપની નાઈટ ફ્રેન્ક ઈન્ડિયાએ એક રિપોર્ટ જાહેર કર્યો છે. દેશના આઠ મોટા શહેરોમાં મજબૂત માંગને કારણે જુલાઈ-સપ્ટેમ્બર ક્વાર્ટરમાં ઘરનું વેચાણ વાર્ષિક ધોરણે ૧૨ ટકા વધીને ૮૨,૬૧૨ યુનિટ થયું છે. આ છ વર્ષમાં સૌથી વધુ ત્રિમાસિક વેચાણનો આંકડો છે. એક વર્ષ અગાઉના સમાન ગાળામાં આઠ મોટા શહેરોમાં રહેણાંક એકમોનું વેચાણ ૭૩,૬૯૧ યુનિટ હતું. નાઈટ ફ્રેન્કના એક રિપોર્ટમાં આ જાણકારી આપવામાં આવી છે.
નાઈટ ફ્રેન્ક ઈન્ડિયાના બુધવારે (૪ ઓક્ટોબર)ના રોજ જાહેર કરાયેલા અહેવાલમાં કહેવામાં આવ્યું છે કે આ આંકડો મહત્વપૂર્ણ છે કારણ કે ત્રિમાસિક વેચાણ છ વર્ષમાં સૌથી વધુ સ્તરે પહોંચી ગયું છે. ડેટા અનુસાર, જુલાઈ-સપ્ટેમ્બર ક્વાર્ટર દરમિયાન મુંબઈમાં ઘરનું વેચાણ ચાર ટકા વધીને ૨૨,૩૦૮ યુનિટ થયું હતું, જે એક વર્ષ અગાઉ ૨૧,૪૫૦ યુનિટ હતું. આ છ વર્ષમાં સૌથી વધુ ત્રિમાસિક વેચાણનો આંકડો છે.
દિલ્હી-એનસીઆરમાં હાઉસિંગનું વેચાણ રિપોર્ટિંગ સમયગાળામાં ૧૧,૦૧૪ યુનિટથી ૨૭ ટકા વધીને ૧૩,૯૮૧ યુનિટ થયું છે. બેંગલુરુમાં રેસિડેન્શિયલ પ્રોપર્ટીનું વેચાણ ૧૩,૦૧૩ યુનિટથી નજીવું વધીને ૧૩,૧૬૯ યુનિટ થયું હતું, જ્યારે પુણેમાં વેચાણ ૧૦,૮૯૯ યુનિટથી ૨૦ ટકા વધીને ૧૩,૦૭૯ યુનિટ થયું હતું.
હૈદરાબાદમાં ઘરનું વેચાણ ૭,૯૦૦ યુનિટથી પાંચ ટકા વધીને ૮,૩૨૫ યુનિટ થયું હતું અને અમદાવાદમાં તે ૩,૮૮૭ યુનિટથી છ ટકા વધીને ૪,૧૦૮ યુનિટ થયું હતું. ચેન્નાઈમાં વેચાણ ૩,૬૮૫ યુનિટથી પાંચ ટકા વધીને ૩,૮૭૦ યુનિટ થયું છે, જ્યારે કોલકાતામાં વેચાણ ૧,૮૪૩ યુનિટથી બમણાથી વધુ વધીને ૩,૭૭૨ યુનિટ થયું છે.
નાઈટ ફ્રેન્કે જણાવ્યું હતું કે, વધતી માંગને કારણે તમામ બજારોમાં વાર્ષિક ધોરણે ઘરની કિંમતોમાં પણ વધારો થયો છે. હૈદરાબાદમાં ઘરની કિંમતમાં વાર્ષિક ધોરણે સૌથી વધુ ૧૧ ટકાનો વધારો થયો છે. કોલકાતામાં રેસિડેન્શિયલ પ્રોપર્ટીના ભાવમાં સાત ટકા, બેંગલુરુ અને મુંબઈમાં છ ટકા, પુણેમાં પાંચ ટકા, અમદાવાદ અને દિલ્હી-એનસીઆરમાં ચાર ટકા અને ચેન્નાઈમાં ત્રણ ટકાનો વધારો થયો છે.
નાઈટ ફ્રેન્ક ઈન્ડિયાના ચેરમેન અને મેનેજિંગ ડિરેક્ટર શિશિર બૈજલે જણાવ્યું હતું કે ઘરના વેચાણની ગતિ ચાલુ છે અને તે ઘણા વર્ષોમાં ઉચ્ચતમ સ્તરે પહોંચી ગઈ છે. મજબૂત માંગને પહોંચી વળવા બિલ્ડરો નવા પ્રોજેક્ટ શરૂ કરી રહ્યા છે જેના કારણે મકાનોનો પુરવઠો પણ મજબૂત છે. વેચાણના સારા આંકડા વચ્ચે રિયલ એસ્ટેટ માર્કેટની એકંદર આરોગ્ય સુધરી રહી છે.