ઇન્ડિયા ગઠબંધન મજબૂરીમાં કરવામાં આવ્યું છે. વિપક્ષનો એક પણ સાંસદ તમને ઇન્ડિયાનો અર્થ કહી શક્યો નથી.

વડાપ્રધાન નરેન્દ્ર મોદીએ બુધવારે રાત્રે નેશનલ ડેમોક્રેટિક એલાયન્સ (NDA)ના 48 સાંસદો સાથે બેઠક યોજી હતી. અહેવાલો અનુસાર, સંસદના એનેક્સી બિલ્ડિંગમાં આયોજિત આ બેઠકમાં વડાપ્રધાને સાંસદોને કહ્યું છે કે ગરીબ સૌથી મોટી જાતિ છે, તેમના માટે કામ કરો.

તેમણે એમ પણ કહ્યું કે કેન્દ્ર સરકારે સામાન્ય લોકો માટે ઘણી કલ્યાણકારી યોજનાઓ શરૂ કરી છે. સરકારનો ધ્યેય રાજ્ય તંત્રની મદદ વગર બિન-ભાજપ શાસિત રાજ્યોમાં આ યોજનાઓના લાભો લોકોને પહોંચાડવાનો છે.

બેઠક દરમિયાન વિપક્ષના ગઠબંધન પર નિશાન સાધતા તેમણે કહ્યું કે આ ગઠબંધન મજબૂરીમાં કરવામાં આવ્યું છે. વિપક્ષનો એક પણ સાંસદ તમને I.N.D.I.A.નો અર્થ કહી શક્યો નથી.

લગભગ એક કલાક સુધી ચાલેલી બેઠકમાં પીએમ મોદીએ કહ્યું કે તેઓ શક્ય હોય ત્યાં સુધી પોતાના સંસદીય ક્ષેત્રમાં રહે. તેમણે સાંસદોને 2024ની લોકસભા ચૂંટણી માટે સક્રિય તૈયારીઓ શરૂ કરવાની સલાહ પણ આપી હતી.

પીએમ મોદીએ કહ્યું કે સરકારના 9 વર્ષ પૂરા થવા પર જે ‘જન સંપર્ક અભિયાન’ ચલાવવામાં આવી રહ્યું છે, તેને સતત આગળ વધારવું પડશે અને પૂરા જોશ સાથે કામ કરવું પડશે કારણ કે ચૂંટણીમાં માત્ર થોડા મહિના જ બાકી છે.

પીએમ મોદીએ બુધવારે સૌથી પહેલા મહારાષ્ટ્ર ભવનમાં ઉત્તર પ્રદેશના કાશી અને અવધ ક્ષેત્રના NDA સાંસદો સાથે બેઠક કરી હતી. કેન્દ્રીય પ્રધાન રાજનાથ સિંહ અને ગૃહ પ્રધાન અમિત શાહ અને અનુપ્રિયા પટેલ અને મહેન્દ્ર નાથ પાંડે ક્લસ્ટર-3ની બેઠકમાં હાજરી આપી હતી.

ક્લસ્ટર 4ની બીજી બેઠકમાં તેલંગણા, આંધ્રપ્રદેશ, તમિલનાડુ, કર્ણાટક, કેરળ, પુડુચેરી, આંદામાન અને નિકોબાર ટાપુઓ અને લક્ષદ્વીપના સાંસદોએ હાજરી આપી હતી. બેઠકમાં બીજેપી અધ્યક્ષ જેપી નડ્ડા, પ્રહલાદ જોશી અને વી મુરલીધરન પાંડે હાજર હતા.

પીએમ મોદી 10 દિવસમાં NDAના તમામ સાંસદોને મળવાની યોજના ધરાવે છે. ભાજપે એનડીએ સાંસદોને 11 ક્લસ્ટર (વિસ્તારો)માં વિભાજિત કર્યા છે. કેન્દ્રીય મંત્રીઓ સંજીવ બાલાયન, બીએલ વર્મા, ધર્મેન્દ્ર પ્રધાન અને શાંતનુ ઠાકુર મોદી અને સાંસદો વચ્ચેની બેઠકની તૈયારી કરી રહ્યા છે.

3જી ઓગસ્ટે 5મી અને 6ઠ્ઠી ક્લસ્ટર બેઠકમાં બિહાર, દિલ્હી, હિમાચલ પ્રદેશ, પંજાબ, ચંદીગઢ, હરિયાણા, ઉત્તરાખંડ, જમ્મુ અને કાશ્મીર, લદ્દાખના 63 સાંસદો ભાગ લેશે.

8 ઓગસ્ટે પીએમ મોદી રાજસ્થાન, મહારાષ્ટ્ર અને ગોવાના 76 સાંસદોને મળવાના છે.

9 ઓગસ્ટે મધ્યપ્રદેશ, છત્તીસગઢ, ગુજરાત, દાદરા અને નગર હવેલી, દમણ અને દીવના 81 સાંસદો સાથે વાતચીત કરવામાં આવશે. આ સિવાય બીજેપી ટૂંક સમયમાં ઉત્તર-પૂર્વ ક્ષેત્રના 31 સાંસદો સાથે પીએમની બેઠકની તારીખ નક્કી કરશે.

વડાપ્રધાન નરેન્દ્ર મોદીએ NDA સાંસદોને રક્ષાબંધન દરમિયાન મુસ્લિમ મહિલાઓને મળવાનું કહ્યું છે. PMએ સાંસદોને રક્ષાબંધન દરમિયાન કાર્યક્રમોનું આયોજન કરવા અને મુસ્લિમ મહિલાઓને મળવા કહ્યું છે. બેઠકમાં હાજર કેટલાક સાંસદોએ જણાવ્યું કે પીએમ મોદીએ સમાજના દરેક વર્ગ સાથે જોડાવા પર આગ્રહ કર્યો છે.