
અમદાવાદ,
ઘોર કળિયુગ હોવાનો અજીબ કિસ્સો પ્રકાશમાં આવ્યો છે, જેમાં એલિસબ્રિજની મહિલાએ તેના જ દીકરાના મિત્ર સાથે પ્રેમસંબંધ રાખ્યો હોવાની ચોંકાવનારી ઘટના પ્રકાશમાં આવી છે. મહિલાએ અડધી ઉંમરના પુત્રના મિત્ર સાથે શરીર સંબંધ રાખ્યા હતા. આમ, પતિ સાથે ન ફાવતું હોવાથી મહિલાએ પ્રેમસંબંધ બાંધ્યો હતો. આ અંગે એલિસબ્રિજ પોલીસે ગુનો નોંધી આરોપીની શોધખોળ હાથ ધરી છે. મહિલા સાથે લગ્ન ન કરતાં યુવક સામે ફરિયાદ નોંધાઈ હતી.
શહેરના એલિસબ્રિજ વિસ્તારમાં ૪૩ વર્ષીય મહિલા તેના ૨૧ વર્ષના પુત્ર અને પતિ સાથે રહે છે. મહિલાનો પતિ વેપારી છે, જ્યારે મહિલા પણ વેપાર કરે છે. મહિલા અને તેના પતિ વચ્ચે સારા સંબંધ ન હોવાને કારણે બંને વચ્ચે સામાન્ય વિવાદ ચાલી રહ્યો હતો. એના ચારેક મહિના પહેલાં વેપારની જગ્યા પર પુત્રના મિત્રએ અન્ય એક મિત્ર ઉઝેરની ઓળખાણ મહિલા સાથે કરાવી હતી.
ઉઝેર સાથે મહિલાએ મિત્રતા કરી હતી. દરમિયાન મહિલા તેના વેપારના સ્થળે હાજર હોય ત્યારે વારંવાર ઉઝેર આવતો હતો અને મહિલા સાથે વાતો કરતો હતો. બંનેએ એકબીજાના મોબાઇલ નંબરની આપ-લે કરી હતી. બંને અવારનવાર ફોન પર મેસેજ અને કોલથી વાત કરવા લાગ્યાં હતાં.
રાત્રે વેપારના સ્થળે મહિલા હાજર હોય ત્યારે ઉઝેર આવતો અને વાતો કરતો હતો. મહિલાએ તેને પોતાના પતિ સાથે ન બનતું હોવા અંગે વાતચીત કરી હતી અને અનેક તકલીફોની વાતચીત કરી હતી. વધુ વિગતો જાણી ઉઝેર વારંવાર તેને મળતો હતો અને તેની તમામ તકલીફોમાં સાથ આપવા લાગ્યો હતો, જેથી મહિલાને પણ તે ગમવા લાગ્યો હતો.
ઉઝેરે મહિલાને જણાવ્યું હતું કે મને તમારી સાથે પ્રેમ થઈ ગયો છે અને હું લગ્ન કરવા માગું છું. તમારી સાથે લગ્ન કરી તમને ખુશ રાખીશ એમ તે કહેવા લાગ્યો હતો. દરમિયાન મહિલા અને તેનો પતિ સારી રીતે સાથે રહેતા ન હોવાથી ઉઝેર સાથે પ્રેમસંબંધ રાખવા તૈયાર થઈ ગઇ હતી.
ગત જાન્યુઆરી ૨૦૨૩ના પહેલા અઠવાડિયામાં ઉઝેરે મહિલાને પાલડી ચાર રસ્તા પાસે આવેલી ક્રિસ્ટલ ઇન હોટલમાં મળવા બોલાવી હતી, જેથી પ્રેમમાં આંધળી મહિલા ત્યાં પહોંચી ગઇ હતી અને બંને વચ્ચે શારીરિક સંબંધો બંધાયા હતા. લગ્ન પછી એક થઇ જવાની ઉઝેર વાતો કરતો હતો. આમ, અવારનવાર ઉઝેર ક્રિસ્ટલ ઇન હોટલમાં બોલાવતો અને દુષ્કર્મ આચરતો હતો. તેણે અવારનવાર મહિલાને છીપાવાડમાં આવેલા તેના ઘરે બોલાવી પણ શરીર સંબંધ બાંયા હતા.
ઉઝેર તેના ખાતામાં ટુકડેટુકડે ૫૫ હજાર ઓનલાઇન ટ્રાન્સફર કરાવી લીધા હતા. દરમિયાન તેણે છેલ્લા ૧૦ દિવસ પહેલાં મહિલા સાથે દુષ્કર્મ આચર્યું હતું. આ દરમિયાન મહિલાના પતિ-પુત્રને ઉઝેર અને તેના વચ્ચેના પ્રેમસંબંધની જાણ થઇ ગઇ હતી, બંને સાથે ઝઘડો થયો હતો, જેથી મહિલા ઘર છોડી જતી રહી હતી. આ બાબતે ઉઝેરને જાણ થતાં તેણે લગ્ન કરવાની ના પાડી દીધી હતી અને તેણે બીજી છોકરી સાથે પ્રેમસંબંધ હોવાનું જણાવ્યું હતું.
આ અંગે મહિલાએ એલિસબ્રિજ પોલીસ સ્ટેશનમાં ફરિયાદ નોંધાવી હતી. મહિલાએ ફરિયાદ કરતાં ઉઝેર અને તેના મિત્રએ ધમકી આપી હતી. એલિસબ્રિજ પોલીસે મહિલાનું મેડિકલ ચેકઅપ કરાવવાની તજવીજ હાથ ધરી છે. પોલીસે આરોપી ઉઝેરની શોધખોળ હાથ ધરી રહી છે.