નવીદિલ્હી,
હિંડનબર્ગના અહેવાલને લઈને સંસદથી લઈને શેરીઓમાં ભારે હોબાળો થયો હતો. કોંગ્રેસના નેતા ડૉ.જયા ઠાકુરે આ મુદ્દે સુપ્રીમ કોર્ટમાં અરજી કરી હતી. જેના પર કોર્ટે સુનાવણી કરવા સંમતિ આપી છે. આ મામલે ૧૭ ફેબ્રુઆરીની તારીખ નક્કી કરવામાં આવી છે. ડો. જયા ઠાકુરે પોતાની અરજીમાં હિંડનબર્ગના અહેવાલને ટાંકીને અદાણી જૂથ સામે તપાસની માંગ કરી છે.
હકીક્તમાં આ મામલો તાકીદની યાદી માટે ભારતના મુખ્ય ન્યાયાધીશ ડીવાય ચંદ્રચુડ સમક્ષ મૂકવામાં આવ્યો હતો. જેના પર સીજેઆઇએ ૨૪ ફેબ્રુઆરીની તારીખ આપી હતી, પરંતુ અરજદારના વકીલે કોર્ટને કહ્યું કે આવા જ બે અન્ય કેસ પણ વિચારણા હેઠળ છે, જેની સુનાવણી ૧૭ ફેબ્રુઆરીએ થવાની છે. જેના પર ચીફ જસ્ટિસે અરજીને પોતાની સાથે ટેગ કરતા તેની તારીખ પણ ૧૭ ફેબ્રુઆરી કરી હતી.
અરજદારે તેની અપીલમાં જણાવ્યું હતું કે લાઇફ ઇન્સ્યોરન્સ કોર્પોરેશન ઓફ ઇન્ડિયા અને સ્ટેટ બેંક ઓફ ઇન્ડિયાએ અદાણી એન્ટરપ્રાઇઝના એફપીઓમાં શેર દીઠ રૂ. ૩,૨૦૦ના ભાવે રોકાણ કર્યું હતું, જ્યારે સેકન્ડરી માર્કેટમાં શેર પ્રતિ શેર રૂ. ૧,૮૦૦ આસપાસ હતો. આવી સ્થિતિમાં તેમની ભૂમિકાની તપાસ થવી જોઈએ. તેમણે આરોપ લગાવ્યો હતો કે ગૌતમ અદાણી અને તેમના સહયોગીઓએ લાખો કરોડ રૂપિયાના જાહેર નાણાંની ઉચાપત કરી છે. અરજદારે સીબીઆઇ ઇડી ડીઆરઆઇ એસઇબીઆઇ આરબીઆઇ એસએફઆઇઓ વગેરે જેવી તપાસ એજન્સીઓ દ્વારા તપાસની માંગ કરી છે.
અદાણી-હિંડનબર્ગ કેસને લઈને સોમવારે સુપ્રીમ કોર્ટમાં સુનાવણી હાથ ધરવામાં આવી હતી. આ દરમિયાન કેન્દ્ર સરકાર વતી સોલિસિટર જનરલ તુષાર મહેતા હાજર થયા અને તમામ હકીક્તો બેન્ચ સમક્ષ મૂકી. તેમણે સ્પષ્ટ કર્યું કે આ મામલે નિષ્ણાત સમિતિની રચના કરવામાં આવે તો સરકારને કોઈ વાંધો નથી. એટલે કે સરકાર સમિતિની રચના કરવા સંમત થઈ ગઈ છે.