15મી વિધાનસભાના ત્રીજા સત્ર એટલે કે ચોમાસુ સત્રના અંતિમ દિવસે રાજ્ય સરકારે ગુજરાત પબ્લિક યુનિવર્સિટીઝ બિલ 2023 ગૃહમાં પસાર કર્યું હતું. જે વિધાનસભામાંથી પસાર થયા બાદ રાજ્યપાલની મંજૂરી માટે મોકલવામાં આવ્યું હતું. રાજ્યપાલની મંજૂરી મળ્યા બાદ સમગ્ર રાજ્યમાં આ નવીન એકટની જોગવાઈઓ આજથી એટલે કે 9મી ઓક્ટોબરથી લાગુ થનાર છે.
ગુજરાતની 11 યુનિવર્સિટીમાં પબ્લિક યુનિવર્સિટીઝ બિલની જોગવાઈનો અમલ આજથી શરૂ. પબ્લિક યુનિવર્સિટીમાં કુલપતિની ટર્મ 5 વર્ષની રહેશે. એક ટર્મ પૂર્ણ થયા બાદ અન્ય યુનિવર્સિટીના કુલપતિ તરીકે પાંચ વર્ષ ફરી વખત નિમણૂંક કરી શકાશે. જેનાથી યુનિવર્સિટીને કૌશલ્યવાન, ડાયનેમિક કુલપતિ પ્રાપ્ત થશે અને યુનિવર્સિટી સિસ્ટમને સ્થાપિત હિતો માટે ઉપયોગ કરવાના મુદ્દાઓનો પણ અંત આવશે. આ વિધેયકની જોગવાઈઓના પાલનથી રાષ્ટ્રીય શિક્ષણ નીતિ (NEP) 2020માં થયેલ સૂચનોનું અમલીકરણ વધુ સારી રીતે થઇ શકાશે. સુયોગ્ય સંકલનથી યુનિવર્સિટીઓ દ્વારા ઉચ્ચ શિક્ષણ પ્રાપ્ત કરવા માટેની સુવિધાઓનો યોગ્ય ઉપયોગ થઇ શકાશે. સુગઠિત નાણાંકીય અંકુશ આવશે. વિવિધ ક્ષેત્રોમાં પરિવર્તનાત્મક સંશોધનોને વેગ મળશે અને યુનિવર્સિટીને વધુ ઓટોનોમી પ્રાપ્ત થશે.
યુનિવર્સિટીના સંચાલન અને વ્યવસ્થાપન માટે બોર્ડ ઓફ મેનેજમેન્ટ મહત્વની ભૂમિકા ભજવશે. બિલથી 11 યુનિવર્સિટીમાં પ્રવેશ, અભ્યાસ અને પરીક્ષા પદ્ધતિમાં એકસુત્રતા આવશે. 10 પબ્લિક યુનિવર્સિટીઓમાં ચાન્સેલર રાજ્યપાલ આચાર્ય દેવવ્રત રહેશે. એમ.એસ.યુનિવર્સિટીમાં ચાન્સેલરના પદે શુભાંગીની રાજે ગાયકવાડ રહેશે. યુનિવર્સિટીઓમાં સેનેટ અને સિન્ડિકેટને સ્થાને બોર્ડ ઓફ મેનેજમેન્ટ કાર્યરત થશે. એક્સટર્નલ તરીકે યુનિવર્સિટી વિદ્યાર્થીઓને ડિગ્રી આપી શકશે.
કઈ યુનિવર્સિટીની સત્તા સરકાર પાસે રહેશે?
- – ગુજરાત યુનિવર્સિટી
- – સરદાર પટેલ યુનિવર્સિટી
- – સૌરાષ્ટ્ર યુનિવર્સિટી
- – મહારાજા કૃષ્ણકુમારસિંહજી ભાવનગર યુનિવર્સિટી
- – હેમચંદ્રાચાર્ય ઉત્તર ગુજરાત યુનિવર્સિટી
- – M.S.યુનિવર્સિટી
- – ડૉ.બાબા સાહેબ આંબેડકર ઓપન યુનિવર્સિટી
- – ક્રાંતિગુરૂ શ્યામજીકૃષ્ણ વર્મા કચ્છ યુનિવર્સિટી
- – ભક્ત કવિ નરસિંહ મહેતા યુનિવર્સિટી
- – ગુરુ ગોવિંદ યુનિવર્સિટી
- – વીર નર્મદ દક્ષિણ ગુજરાત યુનવર્સિટી