ગુરૂગ્રામ,
હરિયાણાના ગુરુગ્રામમાં એક ગાડીએ ત્રણ લોકોને કચડી નાખ્યા છે, જેમાં એક વ્યક્તિએ જીવ ગુમાવ્યો છે અને બે લોકો ગંભીર રીતે ઈજાગ્રસ્ત છે. તેમની હાલત ગંભીર છે. આ ઘટના સીસીટીવીમાં કેદ થઈ છે. ઘટના રવિવારે મોડી રાત્રે ૨ વાગ્યે બની હતી. ગુરુગ્રામના હાઇપ્રોફાઈલ એરિયા ઉદ્યોગ વિહારમાં એક વાઈન શોપની સામે ૨ આટગા ગાડીમાં ૮ લોકો પહોંચ્યા હતા. બધાએ દારૂ પીધો હતો. આરોપીઓએ પહેલા ત્યાં ઊભેલા કેટલાક લોકો સાથે ઝઘડો કર્યો અને પછી રસ્તામાં સ્ટંટબાજી શરૂ કરી તથા ત્રણ લોકોને કચડી નાખ્યા. સ્ટંટબાજીમાં કચરો ઉપાડનાર એકનું મોત થયું છે, જેની હજુ સુધી ઓળખ થઈ નથી. પોલીસે બે આટગા ગાડીને જપ્ત કરી છે. અત્યારસુધી સાત લોકોની ધરપકડ કરવામાં આવી છે.
ઘટના પછી આરોપીઓ ઘટનાસ્થળેથી ફરાર થઈ ચૂક્યા હતા. પોલીસે ગુરુગ્રામના રસ્તાઓ પર લાગેલા સીસીટીવીની તપાસ હાથ ધરતાં આરોપીઓ વિશે માહિતી મળી હતી. સૌથી પહેલા ગુરુગ્રામના ડુંડાહેરા ગામના રહેવાસી સૌરભ શર્માની ધરપકડ કરવામાં આવી છે. સૌરભ શર્મા જ તે ગાડી ચલાવી રહ્યો હતો. સૌરભની પૂછપરછ પછી રાહુલ, બે સગા ભાઈ રવિ અને વિકાસ, મુકુલ સોની, મોહિત, લન ભારદ્વાજની ધરપકડ કરવામાં આવી. આઠમો આરોપી હોસ્પિટલમાં દાખલ છે. ઝઘડા દરમિયાન તે ગંભીર રીતે ઈજાગ્રસ્ત હતો.