અમદાવાદ, દૌસાના બાંદીકુઈ નજીક દિલ્હી-મુંબઈ એક્સપ્રેસ વે હાઈવે પર અમદાવાદથી હરિદ્વાર જતી કારને એક ટ્રકે અડફેટે લેતાં કચડી નાખી હતી. આ ગંભીર અકસ્માતમાં ૩ લોકો ઘટનાસ્થળે જ મૃત્યુ પામી ગયા હતા જ્યારે ૫ લોકો ઘવાયા હતા.
માહિતી અનુસાર અમદાવાદથી હરિદ્વાર જતા આ લોકોની કારની ટક્કર પહેલા એક રખડતાં ઢોર સાથે થઇ હતી. જેના બાદ આ લોકો હાઈવે પર ઊતર્યા હતા. તેઓ અમદાવાદથી અસ્થિ વિસર્જન માટે હરિદ્વાર જઇ રહ્યા હતા. તે સમયે જ એક ટ્રકની અડફેડે પરિવારના સભ્યો આવી ગયા હતા.
મૃતકોમાં હસમુખ કાંતીલાલ મકવાણા(૩૨), સીમા હસમુખ અને તેમનો ૫ વર્ષીય પુત્ર મોહન ઘટનાસ્થળે જ મૃત્યુ પામી ગયા હતા. હાલમાં તેમના શબને મડદાંઘરમાં રખાયા છે. દુર્ઘટનામાં કાંતિલાલની દીકરી નીલમ (૨૭), ગીતા રાકેશ કુમાર પરમાર(૩૫) , હસમુખનો ૩ વર્ષનો પુત્ર, ગીતાની દીકરી કાવ્યા અને અમદાવાદના વતની જેઠાભાઈના પુત્ર વિરીતભાઈ (૪૮) ગંભીર રીતે ઘવાયા હતા. હાલ તેમની સારવાર ચાલી રહી છે.