ગોધરા,
ગુજરાત વિધાનસભાની ચૂંટણીમાં પંચમહાલ જિલ્લાની તમામ પાંચ વિધાનસભા બેઠકો પર ભાજપનો ભગવો લહેરાયો હતો. 126 ગોધરા વિધાનસભા બેઠક પર ભાજપના ઉમેદવાર સી.કે. રાઉલજીનો સતત બીજી ટર્મમાં વિજય થયો હતો. ત્યારે આજરોજ ગોધરા શહેરના વાવડી બુઝર્ગ વિસ્તારમાં આવેલ મહેંદી બંગલો પાર્ટીપ્લોટ ખાતે ધારાસભ્ય સી.કે. રાઉલજીનો અભિવાદન સમારોહ યોજવામાં આવ્યો હતો. જેમાં મોટી સંખ્યામાં ભાજપના હોદ્દેદારો અને કાર્યકરો ઉપસ્થિત રહ્યા હતા. આ અભિવાદન સમારોહમાં ધારાસભ્ય સી.કે.રાઉલજી દ્વારા વિધાનસભાની ચૂંટણીમાં રાતદિવસ એક કરનાર પાયાના કાર્યકરોનું ધારાસભ્યના હસ્તે વિશેષ સન્માન કરીને પ્રોત્સાહિત કરવામાં આવ્યા હતા. વિધાનસભા બેઠક વિસ્તારમાં ગ્રામ પંચાયતમાં નોંધપાત્ર કામગીરી કરનાર સરપંચો અને કાર્યકરોનું પણ વિશેષ સન્માન કરવામાં આવ્યું હતું. આ કાર્યક્રમમાં પંચમહાલ સાંસદ રતનસિંહ રાઠોડ, જિલ્લા ભાજપ પ્રમુખ અશ્ર્વિનભાઈ પટેલ સહિતના હોદ્દેદારો ઉપસ્થિત રહ્યા હતા.