ગોધરા,દેશના બંધારણના ઘડવૈયા ડો.બાબાસાહેબ આંબેડકરની 14મી એપ્રિલના રોજ એટલે કે આજે 133મી જન્મ જયંતી નિમિત્તે ગોધરા નગરપાલિકા સફાઈ કર્મીઓ તેમજ ભારતીય જનતા પાર્ટીના અનુસૂચિત જાતિ મોરચાના કાર્યકરો દ્વારા ગોધરાના સર્કિટ હાઉસ ખાતે પંચમહાલ જીલ્લાના ગોધરાના ધારાસભ્ય સી.કે.રાઉલજી તથા નગરપાલિકા પ્રમુખ જયેશભાઈ ચૌહાણ સહિત દલિત સમાજના આગેવાનોની ઉપસ્થિતિમાં શ્રદ્ધાંજલિ અર્પણ કરી ડો.બાબા સાહેબ આંબેડકરને પુષ્પાંજલિ અર્પણ કરવામાં આવી હતી.
ભારતના સંવિધાનના સર્જક અને ભારત રત્ન ડો.બાબાસાહેબ આંબેડકરની 133મી જન્મ જયંતી આજે સંપૂર્ણ દેશમાં હર્ષોલ્લાસ સાથે ઉજવણી કરવામાં આવી રહી છે. ત્યારે આજરોજ ગોધરા નગરપાલિકાના સફાઈ કર્મીઓ તેમજ ભારતીય જનતા પાર્ટીના અનુસૂચિત જાતિ મોરચાના કાર્યકરો દ્વારા ગોધરાના સર્કિટ હાઉસ ખાતે એક રેલી સ્વરૂપે પહોંચી ડો.બાબાસાહેબ આંબેડકરને પુષ્પાંજલિ અર્પણ કરવામાં આવી હતી. જેમાં અનુસૂચિત જાતિ મોરચાના કાર્યકરો તેમજ દલિત સમાજના આગેવાનો સહિત નગરપાલિકાના સફાઈ કામદારો જોડાયા હતા.