ગોધરામાં તમે શાકભાજીની ખરીદી કરવા નીકળ્યા છો તો એટલી તો ચકાસણી કરીને લેજો કે આ શાકભાજી કચરાના ઢગલામાંથી તો લાવેલું નથી. હાલ ગોધરા એપીએમસી ખાતેનો એક વિડિયો વાયરલ થયો છે જેમાં કચરાના ઢગલામાંથી કેટલાક બાળકો શાકભાજી વીણતા હોવાના દ્રશ્યો સામે આવતા ભારે ખળભળાટ મચી જવા પામ્યો છે.
ગોધરા ખાતે મોટું એપીએમસી માર્કેટ આવેલું છે. આ માર્કેટમાં રોજબરોજ ખેડૂતો પોતાના પાકનું વેચાણ કરવા માટે મોટી સંખ્યામાં આવતા હોય છે. ત્યારે કેટલાક લોકો દ્વારા બગડેલું શાકભાજી એપીએમસીમાં જ જાહેરમાં ફેંકવામાં આવતું હોવાથી ત્યાં ગંદકીના મોટા ઢગ જોવા મળી રહ્યા છે. સાફસફાઈનો પણ અભાવ હોવાનું સામે આવ્યું છે. ત્યારે એપીએમસીના કચરાના ઢગલામાંથી કેટલાક બાળકો શાકભાજી કાઢીને તેને બજારમાં વહેંચવા માટે લઈ જતા હોવાનું બહાર આવ્યું છે.
બીજી તરફ બગડેલું અને કચરાના ઢગલામાં નખાયેલું શાકભાજી જો બજારમાં વેચાય તો લોકોના સ્વાસ્થ્ય સાથે પણ ખુલ્લેઆમ ચેડા થતા હોવાનું મનાઈ રહ્યું છે. ત્યારે એપીએમસીના જવાબદાર સત્તાધીશો દ્વારા આ સમગ્ર મામલે તપાસ કરવામાં આવે બાળકોને કોણ આ રીતે શાકભાજી કચરાના ઢગલામાંથી વીણવા માટે મોકલે છે તે પણ એક તપાસનો વિષય છે. કારણ કે એક બાળક નહીં પરંતુ ત્રણથી ચાર બાળકો કચરાના ઢગલામાંથી બગડેલું ફેકાયેલું શાકભાજી થેલીમાં ભરીને લઈ જતા હોવાનો વિડીયો વાઇરલ થયો છે.