ગોધરા તાલુકાના અભરામ પટેલના મુવાડા પાસે બે કાર વચ્ચે સર્જાયેલા અકસ્માતમાં તબીબે પોતાના માતા અને પત્નિને ગુમાવ્યા હતા. બંને મહિલાઓના ધટના સ્થળે મોત નીપજયાં હતા.
પ્રાપ્ત માહિતી અનુસાર મુળ મહિસાગર જિલ્લાના સંતરામપુર તાલુકાના ગોઠીબ ગામે રહેતા અને હાલ અમદાવાદ શહેરના ગોતા વિસ્તારમાં રહેતા કુંજલભાઈ રમણભાઈ પટેલે ગોધરા શહેર બી-ડીવીઝન પોલીસ મથકે ફરિયાદ નોંધાવી હતી. જેમાં જણાવ્યુ હતુ કે,તેઓ વ્યવસાયે તબીબ છે ગત 17ને રાત્રે તેઓ કારમાં માતા તરૂલતાબેન પટેલ અને પત્નિ અંજલીબેન સાથે અમદાવાદથી પોતાના વતન સંતરામપુર ખાતે આવી રહ્યા હતા કુંજલ પટેલ પોતાની કાર લઈને ગોધરા નજીકથી પસાર થતાં છબનપુરથી અમદાવાદ તરફ જતા બાયપાસ રોડ પર અભરામ પટેલના મુવાડા ગામ નજીકથી રાત્રિના સુમારે પસાર થઈ રહ્યા હતા તે વેળાએ પાછળથી પુરઝડપે આવેલા એક અન્ય કારના ચાલકે કુંજલભાઈની કારને ટકકર મારી હતી આ અકસ્માતમાં કારમાં સવાર તમામ વ્યકિતઓને નાની-મોટી ઈજાઓ થવા પામી હતી.
બનાવમાં કુંજલભાઈના પત્નિ અંજલીબેન અને માતા તરૂલતાબેનને ગંભીર ઈજાઓ પહોંચતા ધટના સ્થળે જ મોત નીપજયાં હતા. જયારે કારમાં સવાર અન્ય વ્યકિતઓને પણ નાની-મોટી ઈજાઓ થવા પામી હતી. અકસ્માત બાદ કાર ચાલક પોતાની કાર ધટના સ્થળે મુકીને ફરાર થઈ ગયો હતો. પોલીસે ફરાર થયેલા કાર ચાલક સામે ફરિયાદ નોેંધી આગળ તપાસ હાથ ધરી છે.