ગરબાડા, ગરબાડા તાલુકાના ટુંકીવજુ ગામેથી પોલીસની ટીમે સફેદ પથ્થર કાઢી ચોરી કરી લઈ જતી ટ્રક અને જેસીબી મશીન ઝડપી પાડતા ખનન માફિયાઓમાં ફફડાટ વ્યાપી જવા પામ્યો છે.
ગરબાડા તાલુકાના ગામડે ગામડે બે નંબરમાં સફેદ પથ્થર કાઢી વેચવાનો ગોરખધંધો પાછલા ધણા વર્ષોથી ચાલી રહ્યો છે. આ ખનન માફિયાઓ વિરુદ્ધ કાર્યવાહી કરવામાં આવી છે. છતાં આ ખનન માફિયાઓ પથ્થર કાઢવાનુ ચાલુ રાખ્યુ છે.જેથી ગરબાડા તાલુકાના ટુંકીવજુ ગામે ગરબાડા પોલીસ દ્વારા પેટ્રોલિંગ દરમિયાન ટ્રક અને જેસીબી ઝડપી પાડવામાં આવ્યુ હતુ.અને ઝડપેલ ટ્રક અને જેસીબીને કાર્યવાહી માટે ગરબાડા પોલીસ મથકે લાવવામાં આવ્યા હતા. અને વધુ કાર્યવાહી માટે ગરબાડા પોલીસે રિપોર્ટ કરી ખાણ ખનીજ વિભાગને મોકલી આપ્યો હતો. આવી સફેદ પથ્થરની ચોરી આખા ગરબાડા તાલુકામાં થઈ રહી છે. આ સફેદ પથ્થરનો કાળો કારોબાર કરી સરકારી તિજોરીને લાખો રૂપિયાનો ચુનો ચોપડવામાં આવી રહ્યો છે ત્યારે ખાણ ખનીજ વિભાગ દ્વારા કડક હાથે કાર્યવાહી કરવામાં આવે તે જરૂરી બન્યુ છે.