દાહોદ, દાહોદ જીલ્લાના ગરબાડા તાલુકાના પાટીયાઝોલ ગામેથી પસાર થતી નદીમાં એક કપાસ ભરેલ ટ્રક નદીમાં ખાબકી પડતાં સ્થળ પર લોકટોળા ઉમટી પડ્યાં હતાં. સદ્દનસીબે ટ્રકના ચાલકનો આબાદ બચાવ થયો હતો. ત્યારે કપાસ ભરેલ ટ્રક નદીમાં ખાબકતાં નદીમાં કપાસના ઢગલે ઢગલા જોવા મળ્યાં હતા.
ગરબાડાના પાટીયાઝોલ ગામેથી એક ટ્રકનો ચાલક પોતાના કબજાની ટ્રકમાં કપાસ ભરી પાટીયાઝોલ ગામેથી પસાર થઈ રહ્યો હતો. ત્યારે આ વિસ્તારમાં આવેલ નદીના વિસ્તારમાં ભયજનક વળાંકમાં ટ્રકના ચાલકે સ્ટેરીંગ પરનો કાબુ ગુમાવી દેતાં ટ્રક જોતજોતામાં નદીમાં ખાબકી ગઈ હતી. ટ્રક નદીમાં ખાબકતાંની સાથે નદીના પાણીમાં કપાસના ઢગલે ઢગલા થઈ ગયાં હતાં અને કપાસનો જથ્થો નદીના પાણીમાં તરતો થઈ ગયો હતો. સદ્દનસીબે ટ્રકના ચાલકે સમયસુચકતા વાપરી ટ્રક માંથી બહાર નીકળી જતાં ટ્રકના ચાલકનો આબાદ બચાવ થયો હતો. ત્યારે ઘટનાને પગલે સ્થળ પર લોકટોળા ઉમટી પડ્યાં હતાં. ઘટનાની જાણ સ્થાનીક પોલીસને કરવામાં આવતાં પોલીસે આ સંબંધે કાયદેસરની કાર્યવાહી હાથ ધરી છે.