વોશિગ્ટન, અમેરિકાના બાલ્ટીમોરમાં પેટાપ્સકો નદી પરના પુલ સાથે માલવાહક જહાજ અથડાયું હતું. આ પછી પુલ પત્તાના મહેલની જેમ તૂટી પડ્યો. વાસ્તવમાં આ પુલ સાથે અથડાતા જહાજના તમામ ૨૨ ક્રૂ મેમ્બર ભારતીય છે. દરેક વ્યક્તિ સલામત અને સ્વસ્થ છે. પરંતુ આ અકસ્માતમાં હજુ છ લોકો ગુમ છે. તેમના બચાવ કાર્ય ચાલુ છે.
આ દરમિયાન બાલ્ટીમોર બ્રિજ દુર્ઘટના પર અમેરિકી રાષ્ટ્રપતિ જો બાઈડેનનું નિવેદન સામે આવ્યું છે. તેમણે કહ્યું કે બાલ્ટીમોર બ્રિજ ધરાશાયી થયા બાદ આઠ લોકો ગુમ થયા છે. તેમાંથી બેને બચાવી લેવામાં આવ્યા છે, જ્યારે બાકીના છ હજુ પણ ગુમ છે. તેમને શોધવા માટે રેસ્ક્યુ ઓપરેશન ચાલી રહ્યું છે. બાઈડેને એમ પણ કહ્યું કે, બાલ્ટીમોર પોર્ટ પર જહાજોની અવરજવર હાલ પૂરતું સ્થગિત કરી દેવામાં આવી છે.
બાઈડેને વધુમાં કહ્યું કે, આ ભયાનક અકસ્માતમાં સામેલ તમામ લોકો અને તમામ પરિવારો પ્રત્યે અમારી સંવેદના છે. ખાસ કરીને તે લોકો સાથે જેઓ હાલમાં તેમના પ્રિયજનોના સમાચારની રાહ જોઈ રહ્યા છે. હું જાણું છું કે આવી સ્થિતિની દરેક મિનિટ મોટી લાગે છે. રાષ્ટ્રપતિ બાઈડેને બચાવ કાર્યકરો અને બાલ્ટીમોરના લોકોનો આભાર માન્યો હતો. તેમણે કહ્યું કે આ પુલના નિર્માણનો સંપૂર્ણ ખર્ચ સંઘીય સરકાર ઉઠાવશે.
આ અકસ્માત બાદ બાઈડેને પ્રેસ કોન્ફરન્સને સંબોધી હતી. આ દરમિયાન તેમણે કહ્યું કે, અધિકારીઓનું કહેવું છે કે આ અકસ્માતમાં કુલ આઠ લોકો લાપતા હતા, જેમાંથી બેને બચાવી લેવામાં આવ્યા છે. એકને ઈજા થઈ નથી જ્યારે બીજાની હાલત ગંભીર છે. ગુમ થયેલા લોકોને શોધવા માટે બચાવ કામગીરી ચાલી રહી છે. જોકે તેમણે એમ પણ કહ્યું કે ગુમ થયેલા લોકોની સંખ્યામાં બદલી પણ શકે છે.
તમને જણાવી દઈએ કે અમેરિકાના સ્થાનિક સમય અનુસાર આ દુર્ઘટના રાત્રે લગભગ ૧:૩૦ વાગ્યે થઈ હતી. બાલ્ટીમોરથી કોલંબો જઈ રહેલું આ ૯૪૮ ફૂટનું ડાલી જહાજ બાલ્ટીમોરના ફ્રાન્સિસ સ્કોટ કી બ્રિજના થાંભલા સાથે અથડાયું હતું. જહાજ સાથે અથડાયા બાદ પુલ નદીમાં પડી ગયો હતો. જણાવવામાં આવી રહ્યું છે કે દુર્ઘટના બાદ જહાજમાં પણ આગ લાગી હતી અને જહાજમાંથી કાળો ધુમાડો નીકળવા લાગ્યો હતો. જો કે આ જહાજ પુલ સાથે શા માટે અથડાયું તે અંગે હજુ સુધી માહિતી મળી નથી. તેની ચકાસણી કરવામાં આવી રહી છે.