ભારતીય ક્રિકેટ ટીમનો પૂર્વ કેપ્ટન મહેન્દ્ર સિંહ ધોની ભલે ક્રિકેટ મેદાનથી દૂર છે, પરંતુ સોશિયલ મીડિયા અને ફેન્સ વચ્ચે હંમેશા ચર્ચામાં રહે છે. ફરી એક વખત કેપ્ટન કૂલ ચર્ચામાં આવ્યો છે. આ વખતે તે તેના નવા લુકને લીધે ચર્ચામાં છે. સોશિયલ મીડિયામાં મહેન્દ્ર સિંહ ધોનીની નવી હેરસ્ટાઇલ વાયરલ થઇ રહી છે અને ફેન્સને પણ પસંદ આવી રહી છે. હેર સ્ટાઇલિસ્ટ આલિમ હકીમે ઇન્સ્ટાગ્રામ પર કેટલીક તસવીરો શેર કરી હતી, જેમાં ધોનીની નવી હેરસ્ટાઇલ જોવા મળી.
ક્રિકેટ કરિયર દરમિયાન પણ ધોની જુદી-જુદી હેરસ્ટાઇલને લીધે હંમેશા ચર્ચામાં રહેતો હતો. પછી તે કરિયરની શરૂઆતમાં લાંબા વાળ હોય કે પછી વર્લ્ડકપ જીત બાદ અચાનક મુંડન કરાવવું હોય, ઘોનીએ હંમેશા પોતાના લુકને લઇને પ્રશંસકોને ચોંકાવ્યા છે.હવે મહેન્દ્ર સિંહ ધોની ઇન્ટરનેશનલ ક્રિકેટમાંથી રિટાયર્ડ થઇ ગયો છે, પરંતુ તે નવા લુક્સ સાથે જોવા મળી રહ્યો છે. જો કે, ધોની ફરી એક વખત ક્રિકેટ મેદાન પર જોવા મળશે. યુએઇમાં આઇપીએલના બીજા તબક્કા માટે ધોની ચેન્નઇ સુપર કિંગ્સના કેમ્પ સાથે જોડાશે.