- દેશભરના હાઈવે પરથી ટોલ પ્લાઝા દૂર કરવા સરકારની વિચારણા, વાહનચાલકોને ફાયદો થશે
- તેનાથી હાઈવે પર ટોલ પ્લાઝાની ટોલ વસુલાત માટેની કામગીરીની ભૂમિકા ખતમ થઈ જશે.
નવીદિલ્હી
દેશભરના હાઈવે પર ટોલ પ્લાઝા ગાયબ કરવા સરકાર વિચારણા કરી રહી છે. હવે લોકોને હાઈવે પરના જામમાંથી અને લાંબી ક્તારોમાંથી મુક્તિ મળશે. સરકારહટ્ઠ રોડ ટ્રાન્સપોર્ટ અને હાઈવે મંત્રી નીતિન ગડકરીએ પણ આ બાબતના સંકેત આપ્યા હતા.જો કે, ટોલ સિસ્ટમ બદલવાની વાત ઘણા સમયથી ચાલી રહી છે. નવી સિસ્ટમ ક્યારથી લાગુ થશે અને હાઈવે પરથી ટોલ પ્લાઝા દૂર થવામાં કેટલો સમય લાગશે તે સ્પષ્ટ માહિતી જાહેર કરાઈ નથી.જોકે આ નિર્ણયથી ઇંધણ અને સમયની બચત થશે
જીપીએસ આધારિત ટોલ સિસ્ટમ ફાસ્ટેગને દૂર કરી શકે છે. તેનાથી હાઈવે પર ટોલ પ્લાઝાની ટોલ વસુલાત માટેની કામગીરીની ભૂમિકા ખતમ થઈ જશે. આ જીપીએસ આધારિત ટોલ કલેક્શન સિસ્ટમ વાહનના લોકેશન પ્રમાણે ટેક્સની વસુલાત કરે તેવી સિસ્ટમ લાવવામાં આવી શકે છે. આ નવી સિસ્ટમ લાગુ કરવા માટે હાઈવેની જીઓ-ફેન્સિંગની સુવિધા ઉપલબ્ધ કરાવવામાં આવશે.
ટોલિંગની વર્તમાન પ્રણાલી રસ્તા પર મુસાફરી કરાયેલા નિશ્ર્ચિત અંતર પર આધારિત છે. નવી સિસ્ટમ હાઇવે પર તમારા વાસ્તવિક અંતર અને સમયને આવરી લેશે. જીપીએસ આધારિત સિસ્ટમમાં વાહનના વાસ્તવિક કદ અને વજનના આધારે ટોલ નક્કી કરવામાં આવશે. હાઇવે પર વાહન કેટલી જગ્યા લે છે અને તે રસ્તા પર કેટલું વજન મૂકે છે તેના આધારે ટોલ વસૂલવાનો વિચાર છે.
એક અહેવાલ મુજબ, આ મામલાને લગતા એક વ્યક્તિએ કહ્યું, ‘સડક પરિવહન અને રાજમાર્ગ મંત્રાલયે નેશનલ હાઈવે ફી (દર અને કલેક્શનનું નિર્ધારણ) નિયમો ૨૦૦૮માં સુધારો કર્યો છે. આ વાહન દ્વારા મુસાફરી કરેલા અંતરના આધારે રાષ્ટ્રીય ધોરીમાર્ગો પર ટોલ વસૂલવાની મંજૂરી આપે છે. આ સાથે જીપીએસ આધારિત ટોલ સિસ્ટમ શરૂ કરી શકાશે. પરંતુ આ સિસ્ટમ લાવતા પહેલા રસ્તાઓને ટેક્નિકલ ઈન્ફ્રાસ્ટ્રક્ચર સાથે અપગ્રેડ કરવા માટે ઘણું કામ કરવું પડશે. આ સિવાય મોટર વ્હીકલ એક્ટમાં સુધારાની જરૂર પડી શકે છે. આ સાથે પ્રાઈવસી સંબંધિત મુદ્દા પર પણ યાન આપવું પડશે. તેથી જ દેશના હાઈવે પરથી ટોલ પ્લાઝાને દૂર કરવામાં આ સિસ્ટમને સમય લાગી શકે છે.
આ જીપીએસ આધારિત ટોલ સિસ્ટમ લાગુ કરવા માટે, વાહનોમાં ટ્રેકિંગ ઉપકરણની જરૂર પડશે, જેથી વાહનની હિલચાલ પર નજર રાખી શકાય. હાઇવે પરથી બહાર નીકળવા પર, તમે મુસાફરી કરેલ અંતરના આધારે તમારી પાસેથી ટોલ વસૂલવામાં આવશે. આ સાથે વાહનોને ટોલ પ્લાઝા પર રોકવાની જરૂર નહીં પડે. ટ્રેકિંગ સિસ્ટમથી ટોલની ગણતરી કરવામાં આવશે. આ સિસ્ટમ હેઠળ લોકોએ પોતાનું અને તેમના વાહનોનું રજીસ્ટ્રેશન કરાવવું પડશે. ઉપરાંત, બેંક ખાતાને સિસ્ટમ સાથે લિંક કરવું પડશે.