કેન્દ્રીય ગૃહ પ્રધાન અમિત શાહે લોક્સભામાં તૃણમૂલ કોંગ્રેસના સાંસદ સૌગત રોયના પ્રશ્ર્નના જવાબમાં કટાક્ષ કર્યો હતો. અમિત શાહે કહ્યું કે દેશનું કોઈપણ રાજ્ય પશ્ર્ચિમ બંગાળનું મોડલ અપનાવવા માંગશે નહીં. ટીએમસી સાંસદ રોયે ગૃહમાં પ્રશ્ર્નકાળ દરમિયાન ડાબેરી ઉગ્રવાદને લગતો પ્રશ્ર્ન પૂછ્યો હતો. પશ્ર્ચિમ બંગાળમાં ડાબેરી ઉગ્રવાદના અંતને ટાંકીને રોયે પૂછ્યું કે શું કેન્દ્ર સરકાર આ મોડલને અન્ય રાજ્યોમાં લાગુ કરશે?
ટીએમસી સાંસદ સૌગત રોયના આ સવાલ પર અમિત શાહે કહ્યું, ’જો કોઈ રાજ્ય સારું કરે છે, તો વડાપ્રધાન નરેન્દ્ર મોદીની આગેવાની હેઠળની સરકારને તેનો દાખલો લાગુ કરવામાં કોઈ મુશ્કેલી નથી, પરંતુ કોઈ રાજ્ય એવું ઈચ્છશે નહીં કે પશ્ર્ચિમ બંગાળનું મોડલ તેનું ઉદાહરણ બને અહીં અપનાવવામાં આવશે.
તે જ સમયે, ગૃહ રાજ્ય મંત્રી નિત્યાનંદ રાયે પ્રશ્ર્નોના જવાબ આપતા કહ્યું કે છેલ્લા ૧૦ વર્ષમાં ડાબેરી ઉગ્રવાદની ઘટનાઓમાં ૫૩ ટકાનો ઘટાડો થયો છે. આ ઘટનાઓમાં સુરક્ષા દળોના મૃત્યુની સંખ્યામાં પણ ૭૨ ટકાનો ઘટાડો થયો છે. તેમણે કહ્યું કે ડાબેરી ચરમપંથી પ્રવૃત્તિઓમાં સામેલ લોકો આ દેશના બંધારણ અને લોકશાહીમાં વિશ્ર્વાસ કરતા નથી. તેઓ હથિયારો દ્વારા સત્તા કબજે કરવા માંગે છે.
નિત્યાનંદ રાયે સંસદમાં જણાવ્યું હતું કે વર્ષ ૨૦૧૦માં ૯૬ જિલ્લાઓ ડાબેરી ઉગ્રવાદથી પ્રભાવિત હતા, પરંતુ મોદી સરકારના પ્રયાસોને કારણે ૨૦૨૩માં ડાબેરી ઉગ્રવાદ ઘટીને ૪૨ જિલ્લામાં આવી ગયો હતો. રાયે કહ્યું કે, છેલ્લા ૧૦ વર્ષમાં કરેલા પ્રયાસોની અસર સ્પષ્ટ દેખાઈ રહી છે. આગામી દિવસોમાં ડાબેરી ઉગ્રવાદીઓનો ખાત્મો કરવામાં આવશે.