- આદિવાસીઓના હિતોની ખાતરી આપવામાં આવશે.
નવીદિલ્હી, ભાજપ અનુસૂચિત જનજાતિ મોરચાના રાષ્ટ્રીય અધ્યક્ષ સમીર ઓરાને જણાવ્યું હતું કે ડાબેરીઓ તેમજ લોકોનો એક વિશેષ વર્ગ એવો ભ્રમ ફેલાવવા માંગે છે કે યુસીસી આદિવાસી સમુદાયના લોકોના હિતોને નુક્સાન પહોંચાડશે. ચૂંટણીની મોસમ જોતા કેટલાક રાજકીય પક્ષો પણ તેને હવા આપવાનો પ્રયાસ કરી રહ્યા છે. જ્યારે સત્ય એ છે કે તેના મુસદ્દામાં દેશના તમામ આદિવાસી વર્ગોની આસ્થાના રક્ષણ માટે સંપૂર્ણ વ્યવસ્થા કરવામાં આવશે.
તેમણે આરોપ લગાવ્યો કે દેશની આઝાદીના ૬૦ વર્ષમાં આદિવાસીઓ સાથે છેતરપિંડી કરવામાં આવી, પરંતુ તેમની સ્થિતિમાં કોઈ ફેરફાર થયો નથી. પરંતુ હવે આદિવાસી સમુદાય જોઈ રહ્યો છે કે વડા પ્રધાન નરેન્દ્ર મોદીની સરકાર કેન્દ્રમાં આવ્યા પછી તેમના વિકાસ માટે કેટલું નક્કર ગ્રાઉન્ડ વર્ક થયું છે. વિકાસની નવી સંભાવનાઓ શોધીને આદિવાસી પ્રભુત્વ ધરાવતા વિસ્તારોના જીવનમાં પરિવર્તન લાવવાનું કામ કરવામાં આવી રહ્યું છે.
તેઓને રોજગારીની નવી તકો તો મળી રહી છે જ, પરંતુ તેમની વચ્ચે શિક્ષણનો પણ ફેલાવો થઈ રહ્યો છે. આ જ કારણ છે કે હવે આદિવાસી સમાજ એક થઈને ભાજપને સમર્થન આપી રહ્યો છે. તેમણે દાવો કર્યો હતો કે ચાર રાજ્યોમાં આગામી વિધાનસભાની ચૂંટણીઓ અને ૨૦૨૪માં લોક્સભાની ચૂંટણીમાં ભાજપને આદિવાસી સમુદાયમાંથી વધુ સમર્થન મળશે.
૨૦૧૧ની વસ્તી ગણતરી મુજબ દેશમાં આદિવાસીઓની વસ્તી લગભગ ૮.૬ ટકા છે. હાલમાં તે ૧૦.૫૦ કરોડની નજીક હોઈ શકે છે. દેશમાં લગભગ ૭૦૫ આદિવાસી સમુદાયો છે, જેમાંથી ૭૫ આથક અને સામાજિક સ્તરે ખાસ કરીને નબળા અને પછાત ગણાય છે. તેમની સંખ્યાત્મક તાકાતને કારણે, આ સમુદાયો કોઈપણ ચૂંટણીમાં કોઈપણ પક્ષની જીત અથવા હાર નક્કી કરવામાં મહત્વપૂર્ણ ભૂમિકા ભજવે છે.
દેશની સંસદમાં આ વર્ગને પૂરતું પ્રતિનિધિત્વ આપવા માટે, તેમના માટે મહત્તમ ૪૭ લોક્સભા બેઠકો અનામત રાખવામાં આવી છે. અનુસૂચિત જાતિ માટે મહત્તમ ૮૪ લોક્સભા બેઠકો અનામત છે, આમ અનામત બેઠકોની કુલ સંખ્યા મહત્તમ ૧૩૧ હોઈ શકે છે.
આદિવાસી સમુદાય લાંબા સમયથી કોંગ્રેસની પરંપરાગત વોટબેંક માનવામાં આવતો હતો, પરંતુ છેલ્લા ત્રણ દાયકામાં ભાજપ તેમની વચ્ચે સારી રીતે પ્રવેશ કરવામાં સફળ રહ્યો છે. ૨૦૧૪ની લોક્સભા ચૂંટણીમાં ભાજપને ૨૭ આદિવાસી બેઠકો પર સફળતા મળી હતી, જે ૨૦૧૯માં ૩૧ બેઠકો પર પહોંચી હતી. ભાજપનો દાવો છે કે તે આ મતદારો પર પોતાની પકડ જાળવી રાખશે અને પહેલા કરતા વધુ બેઠકો જીતશે.