નવીદિલ્હી, એન્ફોર્સમેન્ટ ડિરેક્ટોરેટ (ઈડી) એ દિલ્હી એક્સાઇઝ કૌભાંડ સંબંધિત કેસમાં ફરી એકવાર અરવિંદ કેજરીવાલને સમન્સ મોકલ્યું છે. ઈડી દ્વારા કેજરીવાલને મોકલવામાં આવેલ આ ૫મું સમન્સ છે. કેજરીવાલને પહેલીવાર ૨ નવેમ્બરના રોજ બોલાવવામાં આવ્યા હતા. આ પછી તેને ૨૧ ડિસેમ્બર, ૩ જાન્યુઆરી અને ૧૩ જાન્યુઆરીએ બોલાવવામાં આવ્યો હતો. જો કેજરીવાલ આ સમન્સ પર પણ હાજર ન થાય તો તપાસ એજન્સી તેમની સામે ધરપકડ વોરંટ માટે કોર્ટનો સંપર્ક કરી શકે છે.
આમ આદમી પાર્ટી ના વડાએ પ્રતિબદ્ધતાઓને ટાંકીને પ્રથમ ચાર સમન્સની અવગણના કરી હતી. તેમણે એવો પણ આક્ષેપ કર્યો હતો કે કેન્દ્રીય એજન્સી ચૂંટણીના ત્રણ મહિનાથી પણ ઓછા સમય પહેલા તેમની ધરપકડ કરવા અને તેમની પાર્ટીને નબળી પાડવાનું કાવતરું કરી રહી છે.
દિલ્હીની કેજરીવાલ સરકારે વર્ષ ૨૦૨૧-૨૨માં નવી દારૂ નીતિ લાવી હતી. આ પોલિસીમાં કૌભાંડના આક્ષેપો થયા હતા. દિલ્હીના લેટનન્ટ ગવર્નર વીકે સક્સેનાએ આ મામલે સીબીઆઈ તપાસની ભલામણ કરી હતી. જે સમયે દિલ્હીમાં નવી દારૂની નીતિ લાગુ કરવામાં આવી હતી તે સમયે નાયબ મુખ્યમંત્રી મનીષ સિસોદિયા પાસે દિલ્હીનો આબકારી વિભાગ પણ હતો. કૌભાંડના આરોપોને કારણે આ નવી દારૂની નીતિ દિલ્હી સરકાર માટે ગળાનો કાંટો બની ગઈ.
આ દારૂ કૌભાંડના કારણે પૂર્વ નાયબ મુખ્યમંત્રી મનીષ સિસોદિયાની આ વર્ષે ફેબ્રુઆરીમાં ધરપકડ કરવામાં આવી હતી અને તે હજુ પણ જેલમાં છે. દિલ્હી સરકારે ૧૭ નવેમ્બર, ૨૦૨૧ ના રોજ નીતિનો અમલ કર્યો, પરંતુ ભ્રષ્ટાચારના આરોપો વચ્ચે સપ્ટેમ્બર ૨૦૨૨ ના અંતમાં તેને રદ કરી.
તાજેતરમાં જ તપાસ એજન્સીએ સંજય સિંહની ધરપકડ કરી હતી. સંજય સિંહ આપના ત્રીજા નેતા છે જેમની કેન્દ્રીય એજન્સી દ્વારા ધરપકડ કરવામાં આવી છે. તેમની પહેલા મનીષ સિસોદિયાની આ વર્ષની શરૂઆતમાં અને સત્યેન્દ્ર જૈનની ગયા વર્ષે ધરપકડ કરવામાં આવી હતી. જો કે, સત્યેન્દ્ર જૈન હાલમાં તબીબી આધાર પર જેલની બહાર છે.