મેયર શેલી ઓબેરોયે એક કોચિંગ સેન્ટર સામે મોટી કાર્યવાહી કરી છે. તેણે પ્રીત વિહારમાં કોચિંગ સેન્ટરના ભોંયરામાં તપાસ કરીને તેને સીલ કરી દીધું છે. તેમણે કહ્યું, ’આખી દિલ્હીમાં આવી ઘણી કોચિંગ સંસ્થાઓ છે જે ભોંયરામાં ગેરકાયદેસર રીતે ચાલી રહી છે. અમે આવી તમામ કોચિંગ સંસ્થાઓ સામે કડક પગલાં લઈશું અને જો કોઈ અધિકારી આમાં દોષિત જણાશે તો તેની સામે પણ કાર્યવાહી કરવામાં આવશે.
રાષ્ટ્રીય માનવાધિકાર આયોગે કોચિંગ સેન્ટરના ’ભોંયરામાં’ પાણી ભરાવાને કારણે ત્રણ સિવિલ સવસ ઉમેદવારોના મૃત્યુ અંગે દિલ્હી સરકાર, પોલીસ કમિશનર અને મ્યુનિસિપલ કોર્પોરેશન કમિશનરને નોટિસ મોકલી છે. એનએચઆરસીએ તેમની પાસેથી બે અઠવાડિયામાં વિગતવાર અહેવાલ માંગ્યો છે, એમ એક નિવેદનમાં જણાવાયું છે.
એનએચઆરસી દ્વારા જારી કરાયેલા નિવેદન અનુસાર, દિલ્હીના મુખ્ય સચિવને પણ સમગ્ર શહેરમાં નિર્ધારિત ધોરણોનું ઉલ્લંઘન કરીને કાર્યરત આવી સંસ્થાઓ અને કોચિંગ સેન્ટરોની ચોક્કસ સંખ્યા શોધવા માટે વિગતવાર સર્વેક્ષણ કરવા માટે કહેવામાં આવ્યું છે. તેણે કહ્યું કે રિપોર્ટમાં આવી સંસ્થાઓની દરેક વિગતનો ઉલ્લેખ કરવો જોઈએ, જેમાં તેમની સામે પડતર ફરિયાદો અને સંબંધિત વિભાગ દ્વારા લેવામાં આવેલી કાર્યવાહીનો સમાવેશ થાય છે.
એનએચઆરસીએ જણાવ્યું હતું કે તેણે મીડિયા અહેવાલો પર સ્વત: સંજ્ઞાન લીધું છે કે ૨૭ જુલાઈના રોજ દિલ્હીમાં સિવિલ સવસ પરીક્ષા માટે કોચિંગ આપતી પ્રતિષ્ઠિત સંસ્થાની બિલ્ડિંગના ભોંયરામાં પાણી ભરાવાને કારણે ત્રણ ઉમેદવારોના મોત થયા હતા. કમિશને કહ્યું કે આ અહેવાલો દર્શાવે છે કે પાણી ભરાવાને લઈને અધિકારીઓને ઘણી ફરિયાદો કરવામાં આવી હતી, પરંતુ કોઈ પગલાં લેવામાં આવ્યા ન હતા.
આ ઘટના પર ગંભીર ચિંતા વ્યક્ત કરતા પંચે કહ્યું કે સમાચાર અહેવાલો સંબંધિત અધિકારીઓની બેદરકારી દર્શાવે છે. તેણે દિલ્હીના પટેલ નગર વિસ્તારમાં સિવિલ સવસના અન્ય ઉમેદવારના મૃત્યુની પણ નોંધ લીધી છે. નિવેદનમાં કહેવામાં આવ્યું છે કે તે જાણવા મળ્યું છે કે થોડા દિવસો પહેલા, અધિકારીઓની બેદરકારીની અન્ય એક ઘટનામાં, સિવિલ સવસની તૈયારી કરી રહેલા અન્ય એક વિદ્યાર્થીનું પાણી ભરાયેલા રસ્તાને પાર કરતી વખતે વીજ કરંટથી મૃત્યુ થયું હતું.