નવીદિલ્હી,રાજધાની સહિત અનેક જગ્યાએ ઈડી આજે સવારથી દરોડા પાડયા હતાં મળતી માહિતી મુજબ, ઈડી એક સાથે ૧૨ થી વધુ સ્થળો પર દરોડા પાડયા છે, જેમાં સીએમ અરવિંદ કેજરીવાલના અંગત સચિવ બિભવ કુમાર અને શલભ કુમાર સહિત ઘણા નેતાઓના ઘરો પર દરોડા પાડવામાં આવ્યા છે. એવું કહેવામાં આવી રહ્યું છે કે ઈડી અધિકારીઓએ દિલ્હી, ચંદીગઢ અને વારાણસીમાં ૧૨ થી વધુ સ્થળોએ ઘણા લોકોના ઘરોની તપાસ કરી છે. આ શોધ મની લોન્ડરિંગના કેસ સાથે સંબંધિત છે. આ દરોડાની સાથે જ આજે આમ આદમી પાર્ટીની એક પ્રેસ કોન્ફરન્સ પણ યોજાઈ હતી જેમાં દિલ્હી સરકારના મંત્રી આતિશી સિંહે આરોપ લગાવ્યો હતો કે આ બધું અમને ડરાવવા માટે કરવામાં આવી રહ્યું છે.
મળતી માહિતી મુજબ, આપના રાજ્યસભા સાંસદ એનડી ગુપ્તાના ઘર, દિલ્હી જલ બોર્ડના પૂર્વ સભ્ય શલભ કુમારના ઘર અને મુખ્યમંત્રી અરવિંદ કેજરીવાલના ખાનગી સચિવ વિભવ કુમારના ઘર પર ઈડીના દરોડા ચાલુ છે. એવું કહેવામાં આવી રહ્યું છે કે ઈડીએ આ કાર્યવાહી દિલ્હી જલ બોર્ડમાં થયેલા કૌભાંડને લઈને કરી છે.
દિલ્હી સરકારના મંત્રી આતિશીએ આજે સવારે ૧૦ વાગે પ્રેસ કોન્ફરન્સ કરવાની વાત કરી હતી અને તેના પહેલા જ ઈડીનો દરોડો પડ્યો હતો. સૂત્રોના જણાવ્યા અનુસાર મની લોન્ડરિંગ કેસમાં દિલ્હીમાં આમ આદમી પાર્ટીના નેતાઓ અને તેમની સાથે જોડાયેલા લોકોના ઘરો પર દરોડા પાડવામાં આવી રહ્યા છે, પરંતુ હજુ સુધી એ સ્પષ્ટ નથી થયું કે ઈડીએ મની લોન્ડરિંગના કયા કેસમાં દરોડા પાડ્યા છે.
આ દરોડા અંગે શિવસેના યુબીટીના રાજ્યસભા સાંસદ સંજય રાઉતે કેન્દ્ર સરકાર અને ભાજપ પર નિશાન સાધતા કહ્યું કે, આ પણ લોકશાહીની હત્યા છે. દેશમાં કોઈ સરકાર વિરુદ્ધ બોલે તો ઈડી તેના ઘરે પહોંચી જાય છે. તમે જુઓ, લોકશાહીની હત્યા માત્ર ચંદીગઢમાં જ નથી થઈ, સમગ્ર દેશમાં થઈ છે. પહેલા મહારાષ્ટ્ર અને પછી ઝારખંડમાં પણ આવું જ થયું છે. સુપ્રીમ કોર્ટ લોકશાહીની હત્યા કરવાની વાત કરે છે, પરંતુ લોકશાહી બચાવવા માટે કંઈ નથી કહેતી. આખરે કોર્ટ શું કરી રહી છે, આ જનતાનો સવાલ છે.