દાહોદ, દાહોદ તાલુકાના ખંગેલા ચેકપોસ્ટ પરથી પોલીસે એક સ્વીફ્ટ ફોર વ્હીલર ગાડીમાંથી રૂા. 67,680ના પ્રોહીના જથ્થા સાથે ગાડીમાં સવાર બે પૈકી એકની પોલીસે અટકાયત કરી અન્ય ચાર ઈસમો ફરાર થઈ ગયાંનું જ્યારે પોલીસે ફોર વ્હીલર ગાડી મળી કુલ રૂા. 3,17, 680નો મુદ્દામાલ કબજે કર્યાનું જાણવા મળે છે.
ગત તા.31મી ઓગષ્ટના રોજ કતવારા પોલીસને મળેલ બાતમીના આધારે ખંગેલા ચેકપોસ્ટ પર નાકાબંધી કરી આવતાં જતાં તમામ નાના મોટા વાહનોની ચલાસી હાથ ધરતાં હતાં તે સમયે ત્યાંથી બાતમીમાં દર્શાવેલ એક સ્વીફ્ટ ફોર વ્હીલર ગાડી પસાર થતાં પોલીસ સાબદી બની હતી અને ગાડી નજીક આવતાંની સાથે ગાડીમાં સવાર ઈસમોને પકડવાનો પ્રયાસ કરતાં પ્રેમકુમાર ભેરૂલાલ ડોડીયાર (રહે. મધ્યપ્રદેશ) ને પોલીસે પકડી પાડ્યો હતો. જ્યારે તેની સાથેનો નીલેશભાઈ કાળુભાઈ ડામોર (રહે. મધ્યપ્રદેશ) પોલીસને ચકમો આપી ફરાર થઈ ગયો હતો. પોલીસે સ્વીફ્ટ ફોર વ્હીલર ગાડીની તલાસી લેતાં તેમાંથી વિદેશી દારૂ તથા બીટરની કુલ બોટલો નંગ. 504 જેની કુલ કિંમત રૂા. 67,680નો પ્રોહી જથ્થો કબજે કરી ઉપરોક્ત ઝડપાયેલ ચાલકની પુછપરછ કરતાં આ વિદેશી દારૂનો જથ્થો ભાગીદારીમાં ભરી આપનાર, મધ્યપ્રદેશથી આ પ્રોહી મુદ્દામાલ આપનાર અને પાવાગઢ ખાતે આ પ્રોહી જથ્થો મંગાવનાર ઈસમો હોવાનું પોલીસ સમક્ષ જણાવ્યું હતું.
આ સંબંધે કતવારા પોલીસે પ્રોહીબીશનનો ગુનો નોંધી આગળની કાયદેસરની કાર્યવાહી હાથ ધરી છે.