નવીદિલ્હી, ભારત અને ઓસ્ટ્રેલિયા વચ્ચે રમાઈ રહેલી ટેસ્ટ મેચનો આજે પાંચમો અને છેલ્લો દિવસ છે. ટેસ્ટ મેચની ફાઈનલ મેચનો આજે અંતિમ દિવસ છે. જીત માટે ભારત પાસે પહાડ જેવો મોટો લક્ષ્યાંક છે. લંડનના કેનિંગ્ટન ઓવલ ખાતે ભારત અને ઓસ્ટ્રેલિયા વચ્ચે રમાઈ રહેલી વર્લ્ડ ટેસ્ટ ચેમ્પિયનશિપની અંતિમ મેચ છેલ્લા દિવસે રોમાંચક વળાંક પર પહોંચી ગઈ છે. મેચના પાંચમા દિવસે ટીમ ઈન્ડિયાને મેચ જીતવા માટે ૨૮૦ રનની જરૂર છે. આ સાથે જ ઓસ્ટ્રેલિયન ટીમ જીતથી માત્ર ૭ વિકેટ દૂર છે. આ દરમિયાન આ મેચને લગતો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયોમાં અમ્પાયર લાઈવ મેચ દરમિયાન હાથ જોડીને વિનંતી કરતા જોવા મળે છે.
સોશિયલ મીડિયા પર વાયરલ થઈ રહેલો આ વીડિયો મેચના ત્રીજા દિવસનો છે. ઓસ્ટ્રેલિયાની બીજી ઇનિંગ દરમિયાન સ્ટીવ સ્મિથ બેટિંગ કરી રહ્યો હતો. ત્યારબાદ કેટલાક લોકો સાઇડ સ્ક્રીન પર આવ્યા, જેના કારણે સ્મિથે અમ્પાયર રિચર્ડ ઇલિંગવર્થને ફરિયાદ કરી. અમ્પાયર રિચર્ડ ઇલિંગવર્થે પણ પ્રશંસકોને સામેથી દૂર ખસી જવા કહ્યું, પરંતુ ચાહકોને ન ખસતા જોઈને રિચર્ડ ઇલિંગવર્થે ફરીથી હાથ જોડીને પ્રેક્ષકોથી દૂર ખસી જવા કહ્યું. રિચર્ડ ઈલિંગવર્થનો આ વીડિયો ઘણો વાયરલ થઈ રહ્યો છે.