અમદાવાદ, અમદાવાદ શહેરમાં બુટલેગરો બેફામ બન્યાં છે. પોલીસને પડકાર ફેંકી બુટલેગરો દારૂનો ધીક્તો ધંધો કરી રહ્યાં છે. ત્યારે હવે બુટલેગરોએ AMCના મલ્ટિલેવલ પાર્કિંગને જ દારૂનો અડ્ડો બનાવ્યો છે. કોર્પોરેશનના પાર્કિંગમાંથી વિદેશી દારૂનો મસમોટો જથ્થો ઝડપાયો છે.
ક્રાઈમ બ્રાન્ચે બાતમીના આધારે નવરંગપુરામાં મલ્ટિલેવલ પાર્કિંગમાં દરોડો પાડતા કારમાંથી દારૂનો મોટો જથ્થો પકડાયો હતો. દરોડામાં ૯૧૮ દારૂની બોટલ અને ૯૬ બીયરના ટીન મળીને ૧.૩૩ લાખનો દારૂ મળી આવ્યો હતો. જે બાદ પોલીસે દારૂ તથા વૈભવી કાર સહિત ૭૬ લાખનો મુદ્દામાલ જપ્ત કર્યો છે. પોલીસ તપાસમાં જાણવા મળ્યું છે કે આરોપીઓ પાર્કિંગમાં મોંઘીદાટ ગાડીઓ રાખીને તેમાં જ દારૂને સંતાડી રાખતા હતા અને ત્યારબાદ ત્યાંથી ગ્રાહકોને ડિલિવરી આપતા હતા.