મુંબઇ, દિવંગત એક્ટ્રેસ શ્રીદેવીના નિધન બાદ બોની કપૂર તેની બે પુત્રીઓ જાહ્નવી કપૂર અને ખુશી કપૂરનું વધુ ધ્યાન રાખવા લાગ્યા છે. બંને દીકરીઓ તેમના પિતાની ખૂબ જ નજીક છે. જાહ્નવીએ પોતાની ફિલ્મો દ્વારા લોકોના દિલમાં પોતાની જગ્યા બનાવી છે. તેને પોતાની એક્ટિંગથી પોતાની યોગ્યતા સાબિત કરી છે. ખુશી કપૂરે હાલમાં જ એક્ટિંગ ડેબ્યૂ કર્યું છે. બંને બહેનો તેમની માતા શ્રીદેવીની જેમ સારી એક્ટ્રેસ બનવા માંગે છે.
આ દરમિયાન બોની કપૂર, જાહ્નવી અને ખુશી સતત ચર્ચામાં રહે છે. ચર્ચામાં રહેવા પાછળનું કારણ તેના દ્વારા વેચવામાં આવેલા ચાર એપાર્ટમેન્ટ છે. એવું માનવામાં આવે છે કે બોનીએ અંધેરીમાં તેના ૪ ફ્લેટ વેચ્યા છે અને તે પણ મોટી રકમમાં વેચ્યા છે. એક રિપોર્ટમાં ખુલાસો થયો છે કે બોની કપૂર અને તેમની દીકરીઓએ તેમના ૪ એપાર્ટમેન્ટ વેચી દીધા છે. આ ચાર ફ્લેટ મુંબઈના અંધેરીના ગ્રીન એર્ક્સ વિસ્તારમાં છે.
એક રિપોર્ટમાં આ ફ્લેટ ની કિંમતનો પણ ઉલ્લેખ કરવામાં આવ્યો છે. જેમાં લખ્યું છે કે તમામ ફ્લેટ ૧૨ કરોડથી વધુ કિંમતમાં વેચાયા. જ્યારે બે ફ્લેટ રૂપિયા ૬.૦૨ કરોડમાં વેચાયા હતા, જ્યારે વધુ બે ફ્લેટ રૂપિયા ૬ કરોડમાં વેચાયા હતા. મળતી માહિતી મુજબ સૌથી મોટો ફ્લેટ ૧૮૭૦ ચોરસ ફૂટ વિસ્તારમાં ફેલાયેલો હતો. આ મોટો ફ્લેટ અંજુ નારાયણ અને સિદ્ધાર્થ નારાયણને વેચવામાં આવ્યો છે.
જાહ્નવી કપૂર છેલ્લે વરુણ ધવન સાથે ફિલ્મ બવાલમાં જોવા મળી હતી. આ ફિલ્મ કંઈ ખાસ કરી શકી નથી. પરંતુ જાહ્નવીના કામના બધાએ વખાણ કર્યા હતા. તેની પાસે હજુ પણ ઘણા પ્રોજેક્ટ પાઈપલાઇનમાં છે. જેમાંથી એક મિસ્ટર અને મિસેઝ માહી અને બીજી ઉલઝન છે.