ભારતીય જનતા પાર્ટી આજે 2024ની લોકસભા ચૂંટણી માટે ઉમેદવારોની પ્રથમ યાદી જાહેર કરી શકે છે. સૂત્રોના જણાવ્યા અનુસાર આ યાદીમાં વડાપ્રધાન નરેન્દ્ર મોદી, ગૃહમંત્રી અમિત શાહ, રક્ષામંત્રી રાજનાથ સિંહ સહિત લગભગ 155 લોકોનાં નામ સામેલ હોવાની ચર્ચા છે.પીએમ મોદી વારાણસી, અમિત શાહ ગાંધીનગર, રાજનાથ સિંહ લખનૌ, સ્મૃતિ ઈરાની અમેઠી, ધર્મેન્દ્ર પ્રધાન ઓડિશાના સંબલપુર, જ્યોતિરાદિત્ય સિંધિયા ગ્વાલિયર અથવા ગુના-શિવપુરી, શિવરાજ સિંહ ચૌહાણને ભોપાલ અથવા વિદિશા અને સંબિત પાત્રાને ઓડિશાના પુરીથી ટિકિટ આપવામાં આવી શકે છે.
આ ઉપરાંત ભિવાની બલ્લભગઢથી ભૂપેન્દ્ર યાદવ, ડિબ્રુગઢથી સર્બાનંદ સોનોવાલ, રાજૌરી-અનંતનાગથી રવિન્દ્ર રૈના, કોટાથી ઓમ બિરલા, ઉત્તર-પૂર્વ દિલ્હીથી મનોજ તિવારી, પશ્ચિમ દિલ્હીથી પરવેશ વર્મા અને આસનસોલથી ભોજપુરી ગાયક અને અભિનેતા પવન સિંહને મેદાનમાં ઉતારવામાં આવી શકે છે.ભારતીય જનતા પાર્ટીની કેન્દ્રીય ચૂંટણી સમિતિ (CEC)ની પ્રથમ બેઠક ગુરુવારે મોડી રાત સુધી દિલ્હીમાં બીજેપી હેડક્વાર્ટરમાં ચાલી હતી. આ બેઠકમાં વડાપ્રધાન નરેન્દ્ર મોદી, ગૃહમંત્રી અમિત શાહ અને સંરક્ષણ પ્રધાન રાજનાથ સિંહ સહિતના ટોચના નેતાઓ હાજર રહ્યા હતા. આ ઉપરાંત ભાજપ શાસિત રાજ્યોના સીએમ પણ બેઠકમાં ભાગ લેવા આવ્યા હતા.
સૂત્રોના જણાવ્યા અનુસાર આ બેઠક બાદ પાર્ટી લોકસભા ચૂંટણી માટે 100થી 120 સીટો માટે ઉમેદવારો જાહેર કરી શકે છે. બેઠક દરમિયાન નેતાઓએ 2014ની લોકસભા ચૂંટણી અને 2019ની લોકસભા ચૂંટણીમાં પાર્ટીએ ગુમાવેલી બેઠકો અંગે ચર્ચા કરી હતી.
૧૦૦ નામની યાદીમાં ગુજરાતની નબળી બેઠકનો સમાવેશ
જે પ્રથમ ૧૦૦ નામની યાદી જાહેર કરવામાં આવવાની સંભાવના વ્યક્ત કરવામાં આવી રહી છે તેની અંદર ગુજરાતની પણ ચોક્કસ બેઠક પરના ઉમેદવારના નામનો સમાવેશ કરવામાં આવે તેવી સંભાવના છે. જો યાદીમાં ગુજરાતની બેઠકનો સમાવેશ થાય તો તેમાં વર્ષ ૨૦૨૨ ની વિધાનસભા ચૂંટણીમાં ભાજપ માટે નબળી સાબિત થયેલી વિધાનસભા બેઠક ધરાવતી હોય તેવા કલ્સ્ટર વાળી લોકસભા બેઠક પરના નામ જાહેર થઈ શકે છે.
ભાજપ યુપીમાં સાથી પક્ષોને 6 અને ઝારખંડમાં AJSUને એક બેઠક આપશે
ચૂંટણી સમિતિની બેઠકમાં NDAના સહયોગી દળો સાથે બેઠકોની વહેંચણી અંગે પણ ચર્ચા કરવામાં આવી હતી. સૂત્રોના જણાવ્યા અનુસાર ઉત્તર પ્રદેશની 80 લોકસભા બેઠકોમાંથી ભાજપ અપના દળ, RLD અને અન્ય પાર્ટીઓને 6 સીટો આપી શકે છે. આ ઉપરાંત, ઝારખંડની 14 લોકસભા બેઠકોમાંથી, તે AJSU માટે માત્ર ગિરિડીહ બેઠક છોડશે.
આસામની 14 લોકસભા બેઠકો: ભાજપ 11 પર, સાથી પક્ષો 3 પર ચૂંટણી લડશે
આસામમાં 14 લોકસભા સીટો પર ભાજપે તેના સહયોગી દળો સાથે સમજૂતી કરી છે. આસામમાં ભાજપ 11 બેઠકો પર ચૂંટણી લડશે જ્યારે આસામ ગણ પરિષદ (AGP) બે બેઠકો પર ચૂંટણી લડશે અને યુનાઈટેડ પીપલ્સ પાર્ટી લિબરલ (UPPL) એક સીટ પર ઉમેદવાર ઉતારશે. AGP બારપેટા અને ધુબરીમાંથી ઉમેદવારો ઊભા કરશે, જ્યારે UPPL કોકરાઝારથી ઉમેદવારો ઊભા કરશે.
પંજાબ, આંધ્ર અને તમિલનાડુમાં ગઠબંધનની ચર્ચા હજુ પણ ચાલી રહી છે
વડાપ્રધાન નરેન્દ્ર મોદીએ પાર્ટીના કાર્યકરોને ભાજપ માટે 370 અને એનડીએને 400થી વધુ બેઠકો માટે તૈયારી સાથે કામ કરવા જણાવ્યું હતું. આ અંગે બેઠકમાં જૂના સાથીઓને મદદ કરવા અંગે પણ ચર્ચા થઈ હતી.આ માટે પંજાબમાં જૂના સહયોગી અકાલી દળ, આંધ્રપ્રદેશમાં ટીડીપી અને જનસેના, તમિલનાડુમાં એઆઈએડીએમકેને એનડીએમાં પાછા લાવવા માટે વાતચીત થઈ હતી. આ રાજ્યોની બેઠકો હાલ માટે હોલ્ડ પર રાખવામાં આવી છે. જો ગઠબંધન પર વાતચીત થશે તો પાર્ટી તેના આધારે સીટોની વહેંચણી કરશે, નહીં તો તે એકલા ચૂંટણી લડશે.