કાબુલ, અફઘાનિસ્તાનમાં તાલિબાનનું શાસન ચાલી રહ્યું છે. તાલિબાન સરકારના શાસનમાં ભારતીય પ્રતિનિધિમંડળ અનેક વખત અફઘાનિસ્તાનની મુલાકાત લઈ ચૂક્યું છે. આ સમયગાળા દરમિયાન, ભારતે દુષ્કાળ અને ગરીબી વચ્ચે સામાન્ય લોકોને અનાજ અને અન્ય સુવિધાઓ પણ પૂરી પાડી છે. ભારત અને અફઘાનિસ્તાન વચ્ચેની આવી બેઠકોથી પાકિસ્તાન ચોંકી ઉઠ્યું છે. દરમિયાન, ફરી એકવાર ભારતીય પ્રતિનિધિમંડળ અફઘાનિસ્તાનમાં તાલિબાન સરકારને મળ્યું. ભારત અને તાલિબાન વચ્ચે યોજાયેલી આ બેઠકમાં વિદેશ મંત્રાલયના સંયુક્ત સચિવ જેપી સિંહના નેતૃત્વમાં પ્રતિનિધિમંડળ કાબુલમાં તાલિબાનના વિદેશ મંત્રી આમિર ખાન મુત્તાકીને મળ્યા હતા. આ દરમિયાન તેઓ અફઘાનિસ્તાનના પૂર્વ રાષ્ટ્રપતિ હામિદ કરઝાઈને પણ મળ્યા હતા.
આ અંગે તાલિબાનના વિદેશ મંત્રાલયના પ્રવક્તા અબ્દુલ કહાર બલ્કીએ કહ્યું કે અફઘાનિસ્તાન અને ભારત વચ્ચે આથક અને પરિવહન બાબતો પર વિશેષ ચર્ચા થઈ. તેણે સોશિયલ મીડિયા પ્લેટફોર્મ ’ઠ’ પર કહ્યું કે બંને દેશો વચ્ચેના સંબંધો ઐતિહાસિક છે. શ્રી સિંહે કહ્યું કે ભારતે અફઘાનિસ્તાનમાં છેલ્લા અઢી વર્ષમાં વિવિધ વિસ્તારોમાં ઘણી વખત માનવતાવાદી સહાય મોકલી છે.
અફઘાનિસ્તાનમાં સુરક્ષા અને સ્થિરતા સુનિશ્ર્ચિત કરવા તેમજ ડ્રગ હેરફેરનો સામનો કરવા અને ભ્રષ્ટાચાર સામે લડવાના પ્રયાસોની પ્રશંસા કરતા જેપી સિંહે જણાવ્યું હતું કે ભારત અને અફઘાનિસ્તાન રાજકીય અને આથક સહયોગ વધારવા અને ચાબહાર પોર્ટ દ્વારા વેપાર વધારવામાં રસ ધરાવે છે.
બીજી તરફ તાલિબાનના વિદેશ મંત્રાલયે માનવતાવાદી સહાય મોકલવા બદલ ભારતનો વિશેષ આભાર વ્યક્ત કર્યો છે. વિદેશ મંત્રી મુત્તાકીએ કહ્યું કે અમારી સંતુલિત વિદેશ નીતિને અનુરૂપ અમે ભારત સાથે રાજકીય અને આથક સંબંધોને મજબૂત કરવા માંગીએ છીએ. એફએમ મુત્તાકીએ ભારતના સંયુક્ત સચિવને અફઘાન ઉદ્યોગપતિઓ, દર્દીઓ અને વિદ્યાર્થીઓ માટે વિઝા આપવાની પ્રક્રિયાને સરળ બનાવવા વિનંતી કરી.