વિદેશ પ્રધાન એસ જયશંકર એક દિવસની મુલાકાતે કુવૈત પહોંચ્યા હતા જે દરમિયાન તેઓ કુવૈત નેતૃત્વ સાથે ભારત-કુવૈત દ્વિપક્ષીય સંબંધોના વિવિધ પાસાઓ પર વાતચીત કરશે. જયશંકરના દેશમાં આગમન બાદ કુવૈતના વિદેશ મંત્રી અબ્દુલ્લા અલી અલ-યાહ્યાએ તેમનું સ્વાગત કર્યું હતું. જયશંકરે સોશિયલ મીડિયા પ્લેટફોર્મ ‘એકસ’ પર પોસ્ટ કરીને કહ્યું, “હેલો કુવૈત. હું ઉષ્માભર્યા સ્વાગત માટે વિદેશ મંત્રી અબ્દુલ્લા અલી અલ-યાહ્યાનો આભાર માનું છું.
આજે કુવૈતી નેતૃત્વ સાથેની મારી બેઠકોની આતુરતાપૂર્વક રાહ જોઈ રહ્યો છું.’’ વિદેશ મંત્રાલયે મુલાકાત પહેલા એક નિવેદનમાં જણાવ્યું હતું કે તેમની મુલાકાત બંને દેશોને રાજકીય મુદ્દાઓ, વેપાર, રોકાણ, ઉર્જા, સુરક્ષા, સાંસ્કૃતિક, કોન્સ્યુલર, ભારત-કુવૈત સહિત દ્વિપક્ષીય સંબંધોના વિવિધ પાસાઓ પર ચર્ચા કરવાની અને પરસ્પર હિતના પ્રાદેશિક અને આંતરરાષ્ટ્રીય મુદ્દાઓ પર વિચારોનું આદાનપ્રદાન કરવાની તક મળશે.
લગભગ બે મહિના પહેલા કુવૈતમાં એક ઈમારતમાં ભીષણ આગ લાગી હતી. આ દુર્ઘટનામાં ૪૫ ભારતીયોના મોત થયાના લગભગ બે મહિના બાદ વિદેશ મંત્રી અહીંયાની મુલાકાતે આવ્યા છે. કુવૈતના મંગાફમાં જૂન મહિનામાં સાત માળની ઇમારતમાં આગ ફાટી નીકળતાં ઓછામાં ઓછા ૪૯ વિદેશી કામદારો માર્યા ગયા હતા અને ૫૦ અન્ય ઘાયલ થયા હતા. વિદેશ મંત્રી ડૉ. એસ જયશંકરે લખ્યું, કુવૈત રાજ્યના ક્રાઉન પ્રિન્સ હિઝ હાઈનેસ શેખ સબાહ અલ-ખાલિદ અલ-સબાહ અલ-હમદ અલ-મુબારક અલ-સબાહને મળીને હું સન્માનિત છું.
રાષ્ટ્રપતિ અને વડાપ્રધાનને શુભકામનાઓ. ભારત અને કુવૈત સદભાવના અને મિત્રતાનું સદીઓ જૂનું બંધન ધરાવે છે. અમારી સમકાલીન ભાગીદારી સતત આગળ વધી રહી છે. અમારા સંબંધોને ઉચ્ચ સ્તરે લઈ જવા માટે તેમના માર્ગદર્શન અને સૂઝ માટે તેમનો આભાર.