નવીદિલ્હી, આગામી લોક્સભા ચૂંટણીની તારીખો ટૂંક સમયમાં જાહેર થઈ શકે છે. એપ્રિલ-મેમાં મતદાન થઈ શકે છે. તે પહેલા ચૂંટણી લડી રહેલા પક્ષો ઉમેદવારોના નામની જાહેરાત કરી રહ્યા છે. તાજેતરમાં ભાજપે ૧૯૫ ઉમેદવારોની પ્રથમ યાદી પણ બહાર પાડી હતી. હવે વધુ નામોની ચર્ચા ચાલી રહી છે. આ દરમિયાન ભાજપે ટીમ ઈન્ડિયાના ફાસ્ટ બોલર મોહમ્મદ શમીનો સંપર્ક કર્યો છે. ભાજપ લોક્સભા ચૂંટણીમાં શમીને ટિકિટ આપી શકે છે.
અહેવાલ મુજબ, ભાજપ મોહમ્મદ શમીને ચૂંટણીમાં ઉતારવાનું વિચારી રહી છે. આ માટે તેમનો સંપર્ક પણ કરવામાં આવ્યો છે. જોકે, શમીએ હજુ અંતિમ નિર્ણય લીધો નથી. સૂત્રોને ટાંકીને કહેવામાં આવ્યું છે કે મોહમ્મદ શમી સાથેની વાતચીત દરમિયાન તેને પશ્ર્ચિમ બંગાળથી ચૂંટણી લડવા માટે કહેવામાં આવ્યું હતું. ભાજપ બંગાળની બસીરહાટ લોક્સભા સીટ પરથી શમીને મેદાનમાં ઉતારવા માંગે છે. હાલમાં આ સીટ પરથી તૃણમૂલ કોંગ્રેસની નુસરત જહાં સાંસદ છે અને સંદેશખાલીનો વિસ્તાર પણ આ સંસદીય સીટ હેઠળ આવે છે. આ એ જ સંદેશખાલી છે, જ્યાં તાજેતરમાં મોટી સંખ્યામાં મહિલાઓએ પૂર્વ ટીએમસી નેતા શાહજહાં શેખ અને અન્યો પર ઉત્પીડનનો આરોપ લગાવ્યો હતો. ઘણા દિવસોના વિરોધ બાદ આખરે શાહજહાંની ધરપકડ કરીને સીબીઆઈને સોંપવામાં આવ્યો હતો.
મોહમ્મદ શમી પશ્ર્ચિમ બંગાળ માટે સ્થાનિક ક્રિકેટ પણ રમી ચૂક્યો છે. તે જ સમયે તેનો ભાઈ મોહમ્મદ કૈફ પણ પશ્ર્ચિમ બંગાળ માટે રણજી રમે છે. આ વર્ષની શરૂઆતમાં રમાયેલી મેચમાં શમીના ભાઈએ ખૂબ જ જોરદાર પ્રદર્શન કર્યું હતું અને ચાર વિકેટ પણ લીધી હતી. મોહમ્મદ શમીના પશ્ર્ચિમ બંગાળ સાથે જોડાણને કારણે ભાજપ તેને ત્યાંથી ટિકિટ આપવા પર વિચાર કરી રહી છે. જો શમી લોક્સભાની ચૂંટણી લડવા માટે રાજી થશે તો મમતા બેનર્જી સામે ભાજપને રાજ્યમાં બીજો મોટો ચહેરો મળશે. હાલમાં શમી હજુ પણ ઈજાગ્રસ્ત છે અને લાંબા સમયથી ક્રિકેટની પિચથી દૂર છે. તેણે તેની છેલ્લી મેચ ગત વર્ષે ઓસ્ટ્રેલિયા સામે વર્લ્ડ કપ ફાઇનલમાં રમી હતી. મોહમ્મદ શમીએ સમગ્ર ટૂર્નામેન્ટમાં શાનદાર પ્રદર્શન કર્યું અને સૌથી વધુ વિકેટો લીધી.