- કેટલીક જગ્યાએ ધાર્મિક લઘુમતીઓ પરના હુમલાઓને ગંભીર ચિંતા સાથે જોવામાં આવે છે.
બાંગ્લાદેશના નવા ગૃહ સલાહકાર (ગૃહ પ્રધાન) સખાવત હુસૈને રવિવારે હિન્દુ સમુદાયની માફી માંગી હતી કારણ કે તેઓ તેમની પર્યાપ્ત રીતે સુરક્ષા કરી શક્તા નથી. મીડિયા રિપોર્ટ્સ અનુસાર, તેમણે કહ્યું કે હિંદુ લઘુમતીઓનું રક્ષણ કરવું મુસ્લિમ બહુમતીનું ર્ક્તવ્ય છે. તેણે આ જવાબદારીમાં નિષ્ફળતા સ્વીકારી. તેમણે સમુદાયને ભવિષ્યમાં સુરક્ષાની ખાતરી આપી અને સુધારાની આશા વ્યક્ત કરી.
આ સિવાય વચગાળાની કેબિનેટે ગુરુવારે રાત્રે પોતાના સભ્યોના શપથ લીધા બાદ રવિવારે લઘુમતીઓ વિરુદ્ધ હિંસા પર પહેલું નિવેદન આપ્યું હતું. નિવેદનમાં કહેવામાં આવ્યું છે કે, કેટલીક જગ્યાએ ધાર્મિક લઘુમતીઓ પરના હુમલાઓને ગંભીર ચિંતા સાથે જોવામાં આવે છે.
શેખ હસીનાએ વડાપ્રધાન પદ પરથી રાજીનામું આપીને સોમવારે ભારત ભાગી ગયા બાદ બાંગ્લાદેશી હિંદુઓ હિંસા અને લૂંટફાટનો સામનો કરી રહ્યા છે. ઘણા હિંદુ મંદિરો, ઘરો અને વેપારી સંસ્થાઓમાં તોડફોડ કરવામાં આવી છે. બાંગ્લાદેશના પૂર્વ વડાપ્રધાન શેખ હસીનાની અવામી લીગ પાર્ટી સાથે જોડાયેલા ઓછામાં ઓછા બે હિન્દુ નેતાઓ હિંસામાં માર્યા ગયા છે.લઘુમતી હિન્દુ સમુદાયના હજારો સભ્યોએ શનિવારે સતત બીજા દિવસે બાંગ્લાદેશની રાજધાની ઢાકા અને ઉત્તર-પૂર્વીય બંદર શહેર ચિત્તાગોંગમાં ભારે વિરોધ પ્રદર્શન કર્યા હતા.
તેમણે દેશભરમાં મંદિરો, તેમના ઘરો અને વ્યવસાયો પર હુમલાઓ વચ્ચે સુરક્ષાની માંગ કરી હતી.વિરોધ કરી રહેલા હિંદુ સમુદાયના લોકો લઘુમતીઓ પર અત્યાચાર કરનારાઓ સામે કાર્યવાહી ઝડપી કરવા માટે વિશેષ ટ્રિબ્યુનલની સ્થાપના, લઘુમતીઓ માટે ૧૦ ટકા સંસદીય બેઠકો, લઘુમતી સંરક્ષણ અધિનિયમનો અમલ વગેરેની માંગ કરી રહ્યા હતા.
’ઢાકા ટ્રિબ્યુન’ અખબાર અનુસાર, બાંગ્લાદેશ હિંદુ બૌદ્ધ ખ્રિસ્તી ઓક્યા પરિષદ, લઘુમતીઓના અધિકારોની હિમાયત કરતી અગ્રણી સંસ્થાએ મુખ્ય સલાહકાર ડૉ. મુહમ્મદ યુનુસને એક ખુલ્લો પત્ર જારી કર્યો છે. તે ૫ ઓગસ્ટના રોજ શેખ હસીના સરકારના પતન પછી ૫૨ જિલ્લામાં ઉત્પીડનની ૨૦૫ ઘટનાઓની વિગતો આપે છે.પ્રદર્શનકારીઓએ આઠ મુદ્દાનો માંગણી ઢંઢેરો રજૂ કર્યો હતો. આમાં લઘુમતી પર અત્યાચાર કરનારાઓની ટ્રાયલ ઝડપી કરવા, પીડિતોને વળતર અને લઘુમતી સંરક્ષણ અધિનિયમના તાત્કાલિક અમલીકરણ માટે વિશેષ ટ્રિબ્યુનલની સ્થાપનાનો સમાવેશ થાય છે.