કરાંચી,પાકિસ્તાનના બલૂચિસ્તાનમાં ફરી એકવાર મોટો આતંકી હુમલો થયો છે. દક્ષિણ-પશ્ર્ચિમ બલૂચિસ્તાન પ્રાંતમાં થયેલા આતંકવાદી હુમલામાં ચાર સૈનિકો માર્યા ગયા હતા જ્યારે પાંચ અન્ય ગંભીર રીતે ઘાયલ થયા હતા. પાકિસ્તાની સેના દ્વારા આપવામાં આવેલી માહિતી અનુસાર, ભારે હથિયારોથી સજ્જ આતંકવાદીઓએ આર્મી પોસ્ટ પર હુમલો કર્યો, જેમાં ૪ પાકિસ્તાની સૈનિકો માર્યા ગયા અને ૫ અન્ય ગંભીર રીતે ઘાયલ થયા.
પાકિસ્તાન આર્મીની મીડિયા વિંગ ઇન્ટર-સર્વિસ પબ્લિક રિલેશન્સ દ્વારા જારી કરવામાં આવેલા નિવેદનમાં કહેવામાં આવ્યું છે કે આતંકવાદીઓના એક જૂથે પ્રાંતના ઉત્તરમાં ઝોબ ચોકી પર “કાયરતાપૂર્ણ હુમલો” કર્યો હતો. આ દરમિયાન બંને તરફથી ભારે ગોળીબાર થયો હતો જેમાં ત્રણ આતંકીઓ પણ માર્યા ગયા હતા. નિવેદનમાં વધુમાં કહેવામાં આવ્યું છે કે ત્યાંથી પસાર થતી એક મહિલા ભારે ગોળીબાર હેઠળ આવી હતી જ્યારે અન્ય પાંચ નાગરિકો ઘાયલ થયા હતા.
હુમલાની જવાબદારી ઓછા જાણીતા આતંકવાદી જૂથ તહરીક-એ-જેહાદ પાકિસ્તાને લીધી છે, જોકે તેણે કોઈ વિગતો આપી નથી. નિવેદનમાં વધુમાં કહેવામાં આવ્યું છે કે આતંકવાદીઓના વિસ્તારમાં ઘૂસવાના પ્રયાસ દરમિયાન ત્યાં ફરજ પરના જવાનોએ જોરદાર ગોળીબાર શરૂ કરી દીધો હતો. ભારે ગોળીબાર વચ્ચે, તેઓએ આતંકવાદીઓને નાના વિસ્તારમાં સીમિત કર્યા.
સુત્રોના જણાવ્યા અનુસાર, “બાકીના બે આતંકવાદીઓને પણ પકડવા માટે સુરક્ષા દળો દ્વારા ઓપરેશન ચાલુ છે,” સેનાએ દાવો કર્યો કે અમારા સુરક્ષા દળો બલૂચિસ્તાનમાં ‘શાંતિને ખલેલ પહોંચાડવાના અશુભ પ્રયાસો’ને નિષ્ફળ બનાવવા માટે પ્રતિબદ્ધ છે.
બલૂચિસ્તાનના મુખ્યમંત્રી મીર અબ્દુલ કુદુસ બિઝેન્જોએ ઝોબ ગેરીસન પરના હુમલાની સખત નિંદા કરી અને હુમલાને રોકવા માટે તાત્કાલિક કાર્યવાહી કરવા બદલ પાકિસ્તાની સેનાના માર્યા ગયેલા સૈનિકોને શ્રદ્ધાંજલિ આપી. માર્યા ગયેલા લોકોના પરિવારો પ્રત્યે સંવેદના વ્યક્ત કરતા સીએમ બિઝેન્જોએ કહ્યું કે “પાકિસ્તાની સેના આ ક્ષેત્રમાં શાંતિ અને સુરક્ષા જાળવવાની બાંયધરી આપનાર છે.”
પાકિસ્તાનના બલૂચિસ્તાન અને ખૈબર પખ્તુનખ્વા પ્રાંત ઘણા સમયથી આતંકવાદી હુમલાઓથી પરેશાન છે. આ વિસ્તાર પ્રતિબંધિત તહરીક-એ-તાલિબાન પાકિસ્તાન અને બલૂચ અલગતાવાદીઓના હુમલાઓનો સામનો કરી રહ્યો છે. આ મહિનાની શરૂઆતમાં, બલૂચિસ્તાનના ધના સાર વિસ્તારમાં વિદ્રોહી હુમલામાં ચાર સુરક્ષા કર્મચારીઓ માર્યા ગયા હતા જ્યારે એક આતંકવાદી માર્યો ગયો હતો.
પાકિસ્તાન ઇન્સ્ટિટ્યૂટ ફોર કોન્લિક્ટ એન્ડ સિક્યોરિટી સ્ટડીઝ, એક થિંક-ટેંક, આ મહિનાની શરૂઆતમાં બહાર પાડવામાં આવેલા તેના અહેવાલમાં જણાવે છે કે પાકિસ્તાનમાં આતંકવાદી હુમલામાં વધારો થયો છે અને ૨૦૨૩ ના પ્રથમ છ મહિનામાં આતંકવાદી હુમલાઓમાં સતત વધારો થયો છે, જેમાં ૩૮૯ લોકો માર્યા ગયા છે.