સિડની, હવે ઓસ્ટ્રિયામાં હિટલરના ઘરને પોલીસ સ્ટેશન બનાવવાની તૈયારીઓ કરવામાં આવી રહી છે. જ્યાં પોલીસકર્મીઓને માનવ અધિકારની તાલીમ આપવામાં આવશે. બીબીસીના રિપોર્ટ અનુસાર આ જગ્યા ઓસ્ટ્રિયાના બ્રુનાઉમાં છે. જે જર્મનીની સરહદની ખૂબ નજીક છે.
હિટલરનો જન્મ અહીં ૨૦ એપ્રિલ ૧૮૮૯ના રોજ થયો હતો. જો કે, તે માત્ર ૩ વર્ષની ઉંમર સુધી અહીં રહ્યો હતો. ભાડાનું મકાન હોવાને કારણે હિટલરનો પરિવાર અહીંથી ચાલ્યો ગયો હતો. ૨૦૧૬માં લાંબા વિવાદ બાદ ઓસ્ટ્રિયાની સરકારે આ ઈમારત ખરીદી હતી.
૨૦૧૬માં સરકારે હિટલરના ઘરને લઈને એક સમિતિની રચના કરી હતી. તેણે સૂચવ્યું કે હિટલર સાથેના ઇતિહાસને ધ્યાનમાં રાખીને ઘરને તોડી નાખવું જોઈએ. જોકે, તે સમયે મકાન તોડી પાડવાનો ઉગ્ર વિરોધ થયો હતો. દેશના ઘણા મોટા નેતાઓ અને લોકોએ કહ્યું હતું કે આનાથી દેશમાં બનેલી મોટી ઘટનાનો ઈતિહાસ ભૂંસાઈ જશે. ભવિષ્યની પેઢીઓ પણ જાણી શકે કે શું થયું છે, તેથી ઈમારતને તોડવી જોઈએ નહીં.
બીજા વિશ્ર્વ યુદ્ધ દરમિયાન, નાઝીઓએ આ ઇમારતને ધાર્મિક મકાનમાં ફેરવી દીધી. નાઝી સમર્થકો અહીં પ્રવાસીઓ તરીકે આવતા હતા. જો કે, યુદ્ધના અંત તરફ, ૧૯૪૪માં વસ્તુઓ બદલાવા લાગી.
જે બિલ્ડીંગમાં હિટલરનો જન્મ થયો હતો તેની માલિકી ગેલન્ડે પોમર નામની મહિલાની હતી. જેને આ ઘર તેના વડિલો પાસેથી મળ્યું છે. ૧૯૭૨થી સરકારે તેને ભાડે લીધું હતું. તે વિકલાંગ લોકો માટે કેન્દ્ર ચલાવતી હતી. જે ૨૦૧૧માં બંધ કરી દેવામાં આવ્યું હતું. ત્યારથી આ બિલ્ડીંગ ખાલી છે.
૨૦૧૧માં સરકારે તેને ખરીદવાની ઓફર કરી હતી. જોકે, સરકારના દબાણ છતાં ગેરલિંડે તેને વેચવાનો ઇનકાર કર્યો હતો. નાઝી સમર્થકો ઘણી વખત બિલ્ડિંગમાં એકઠા થતા હતા. જેના કારણે સરકારને તેની ખરીદી કરવી જરૂરી હતી. ૨૦૧૬માં સરકારે ૭ કરોડ રૂપિયા આપીને મહિલા પાસેથી બિલ્ડિંગ ખરીદ્યું હતું. હવે ૨૦૨૫ સુધીમાં તેને પોલીસ સ્ટેશનમાં પરિવર્તિત કરવાનું કામ પૂર્ણ થવાની આશા છે.