- લોકો સ્ટુડન્ટ વિઝા લઈને ભણવાને બદલે નોકરી કરવા માટે ઓસ્ટ્રેલિયા આવી રહ્યા છે.
કેનબેરા, ઓસ્ટ્રેલિયાની ઘણી યુનિવર્સિટીઓએ ઉતરપ્રદેશ -પંજાબ સહિત ભારતના ૫ રાજ્યોના વિદ્યાર્થીઓને એડમિશન આપવા પર પ્રતિબંધ લગાવી દીધો છે. ઓસ્ટ્રેલિયન ન્યૂઝ પેપર સિડની મોર્નિંગ હેરાલ્ડ અનુસાર, ઓસ્ટ્રેલિયાની બે મોટી યુનિવર્સિટીઓએ ગયા અઠવાડિયે તેમના એજ્યુકેશન એજન્ટોને પત્ર લખ્યો હતો. જેમાં પંજાબ, હરિયાણા, ઉત્તરાખંડ, ઉત્તર પ્રદેશ અને જમ્મુ-કાશ્મીરના વિદ્યાર્થીઓને પ્રવેશ ન આપવા સૂચના આપવામાં આવી હતી.
ઓસ્ટ્રેલિયાનું ગૃહ વિભાગ જમ્મુ-કાશ્મીર સહિત આ ૫ રાજ્યોના વિદ્યાર્થીઓની વિઝા અરજીઓને સતત નકારી રહ્યું છે. ગયા મહિને ઓસ્ટ્રેલિયાની ૪ યુનિવર્સિટીઓએ ભારતીય વિદ્યાર્થીઓ પર સ્ટુડન્ટ વિઝાનો દુરુપયોગ કરવાના આરોપ લગાવ્યા હતા. તેમણે કહ્યું- લોકો સ્ટુડન્ટ વિઝા લઈને ભણવાને બદલે નોકરી કરવા માટે ઓસ્ટ્રેલિયા આવી રહ્યા છે.
વેસ્ટર્ન સિડની યુનિવર્સિટીએ જણાવ્યું હતું કે ૨૦૨૨માં ઘણા ભારતીય વિદ્યાર્થીઓએ પ્રવેશ મેળવ્યો હતો, પરંતુ તેમનો અભ્યાસ અધવચ્ચે જ છોડી દીધો હતો. યુનિવર્સિટીએ એજન્ટોને જણાવ્યું હતું કે આવું કરનારા મોટાભાગના વિદ્યાર્થીઓ પંજાબ, ગુજરાત અને હરિયાણાના હતા. આ રાજ્યોના વિદ્યાર્થીઓ પરનો પ્રતિબંધ જૂન સુધી ચાલુ રહેશે. આવું વધુ ન થાય તે માટે પ્રવેશ નીતિ વધુ કડક બનાવવામાં આવી રહી છે. હોમ અફેર્સ ડિપાર્ટમેન્ટના રિપોર્ટમાં જણાવવામાં આવ્યું છે કે ભારતમાંથી આવતી દર ૪ સ્ટુડન્ટ વિઝા અરજીમાંથી ૧ છેતરપિંડી છે. આ કારણે ઓસ્ટ્રેલિયામાં અભ્યાસ માટેની અરજીઓનો રિજેક્શન દર પણ વધીને ૨૪.૩% થયો છે. જે છેલ્લા ૧૩ વર્ષમાં સૌથી વધુ છે.
સિડની હેરાલ્ડના અહેવાલ મુજબ, ઓસ્ટ્રેલિયાની યુનિવર્સિટીઓ વિદેશમાં વિદ્યાર્થીઓના પ્રવેશ માટે સંપૂર્ણપણે એજન્ટો પર નિર્ભર છે. વિદ્યાર્થી અને યુનિવર્સિટી બંને એડમિશન માટે એજન્ટોનો સંપર્ક કરે છે. તેના બદલામાં યુનિવર્સિટી એજન્ટોને તગડું કમિશન આપે છે.
રિપોર્ટમાં જણાવવામાં આવ્યું છે કે ૨૦૨૨માં ઓસ્ટ્રેલિયાના પૂર્વ વડાપ્રધાન સ્કોટ મોરિસને કામ કરતા વિદેશી વિદ્યાર્થીઓની નીતિમાં મહત્વનો ફેરફાર કર્યો હતો. જે બાદ સ્ટુડન્ટ વિઝાની માંગમાં વધુ વધારો થયો હતો. ખરેખરમાં, નવા ફેરફાર હેઠળ, ઓસ્ટ્રેલિયામાં અભ્યાસ કરતા વિદેશી વિદ્યાર્થીઓની કામ કરવાની મર્યાદા દૂર કરવામાં આવી હતી. એટલે કે હવે વિદ્યાર્થીઓ ગમે તેટલા કલાકો સુધી કામ કરી શકશે. જો કે હવે આ પોલિસીમાં ફરીથી ફેરફાર કરવાની તૈયારી ચાલી રહી છે. અલ્બેનીઝ સરકાર ફરીથી વિદ્યાર્થીઓના કામના કલાકો પર નિયંત્રણો લાદવા જઈ રહી છે.
ઓસ્ટ્રેલિયામાં ભારતીય વિદ્યાર્થીઓ પર પ્રતિબંધ મૂકવાનો મામલો એવા સમયે ઉગ્ર બન્યો છે જ્યારે વડાપ્રધાન મોદી એક દિવસ પહેલા બુધવારે ઓસ્ટ્રેલિયાના ૨ દિવસના પ્રવાસ બાદ ભારત પરત ફર્યા છે. સિડનીમાં ૨૦,૦૦૦ લોકોને સંબોધિત કરતા પીએમ મોદીએ કહ્યું હતું કે વિદ્યાર્થીઓ બંને દેશોને નજીક લાવી રહ્યા છે. તેમણે એમ પણ કહ્યું હતું કે ભારત અને ઓસ્ટ્રેલિયા વચ્ચે એકબીજાની શૈક્ષણિક ડિગ્રીઓને માન્યતા આપવા પર વાતચીત આગળ વધી છે.