કેરળ, કેરળની કોઝિકોડ મેડિકલ કોલેજ હોસ્પિટલમાં બેદરકારીની વધુ એક ચોંકાવનારી ઘટના પ્રકાશમાં આવી છે. ચાર વર્ષની બાળકી ગંભીર તબીબી બેદરકારીનો શિકાર બની હતી. બાળકીના પરિવારજનોના જણાવ્યા અનુસાર તેના એક હાથમાં છ આંગળીઓ હતી. પરિવારના સભ્યો તેની વધારાની આંગળી કઢાવા માટે હોસ્પિટલ લઈ ગયા હતા.
મીડિયા રિપોર્ટ્સ અનુસાર, છોકરીના એક સંબંધીએ જણાવ્યું હતું કે અમને કહેવામાં આવ્યું હતું કે છોકરીની છમાંથી વધારાની એક આંગળી નાની સર્જરી દ્વારા દૂર કરી દેવાશે. આ વાતને લઈને અમે સૌ સંમત હતા. દવાખાનામાં થોડા સમય પછી, જ્યારે છોકરીને પાછી લાવવામાં આવી તો તેને જોઈને સૌ કોઈ ચોંકી ગયા હતા. છોકરીનું મોં પર પાટાપિંડી કરેલી હતી. અમને ખબર જ ના પડી કે શું થઈ ગયું છે. જ્યારે અમે તેના હાથ તરફ જોયું તો જણાયું કે છઠ્ઠી આંગળી તો હજુ જેમની તેમ જ હતી. બાળકીના વાલીએ જણાવ્યું કે જ્યારે અમે આ બાબતે નર્સને જાણ કરી તો તે સાંભળીને હસવા લાગી. તેણે કહ્યું કે અમને કહેવામાં આવ્યું હતું કે તેની જીભમાં પણ સમસ્યા હતી, જે અમે તેને ઠીક કરી દીધી છે. જ્યારે ડૉક્ટર આવ્યા તો તેમણે આ ભૂલ બદલ માફી માંગી અને કહ્યું કે છઠ્ઠી આંગળી પછીથી દૂર કરી દેવાશે. આ આશ્ર્વાસન પછી તેઓ બાળકીને ઘરે લઈ ગયા હતા. આ સમાચાર સામે આવ્યા બાદ સંબંધિત અધિકારીઓએ આ મામલે તપાસના આદેશ આપ્યા છે. આ ઘટના એવા સમયે સામે આવી છે જ્યારે આ હોસ્પિટલ પહેલાથી જ ચર્ચામાં છે. હકીક્તમાં, ૩૦ વર્ષની મહિલા હષના લાંબા સમયથી તેની ફરિયાદને લઈને વિરોધ કરી રહી છે. હષનાની સી-સેક્શન સર્જરી દરમિયાન ડૉક્ટરો તેના પેટમાં કાતર ભૂલી ગયા હતા અને આ હકીક્ત ફરિયાદમાં સાચી નીકળી હતી.