અમેરિકાની રાજધાની વોશિંગ્ટન ડીસીમાં એક પેસેન્જર વિમાન અને હેલિકોપ્ટર વચ્ચે ટક્કર થઈ છે. દુર્ઘટના બાદ પેસેન્જર વિમાન પોટોમેક નદીમાં પડી ગયું હતું. વિમાનમાં 4 ક્રૂ-મેમ્બર સહિત 64 લોકો સવાર હતા. CBS ન્યૂઝ અનુસાર અત્યાર સુધીમાં 18 મૃતદેહ મળ્યા છે.
વોશિંગ્ટન ફાયર ડિપાર્ટમેન્ટના જણાવ્યા અનુસાર, આ ઘટના બુધવારે રાત્રે રોનાલ્ડ રીગન એરપોર્ટ નજીક બની હતી. આ અકસ્માત અમેરિકન એરલાઇન્સના CRJ700 બોમ્બાર્ડિયર જેટ અને યુએસ આર્મી સિકોર્સ્કી (H-60) હેલિકોપ્ટર વચ્ચે થયો હતો. સેનાના અધિકારીઓના જણાવ્યા અનુસાર, હેલિકોપ્ટરમાં ત્રણ લોકો પણ સવાર હતા.
એરલાઇન કંપનીએ રાત્રે 9 વાગ્યા પછી અકસ્માતની પુષ્ટિ કરી. આ જેટ કેન્સાસ રાજ્યથી રાજધાની વોશિંગ્ટન આવી રહ્યું હતું. અધિકારીઓએ જણાવ્યું હતું કે, રીગન નેશનલ એરપોર્ટ (DCA) નજીક સ્થાનિક સમય મુજબ રાત્રે 8:50 વાગ્યા પછી વિમાન દુર્ઘટના અંગે અનેક ફોન કોલ આવ્યા હતા.હાલમાં, એરપોર્ટ પર બધી ફ્લાઇટ્સ અને લેન્ડિંગ બંધ કરી દેવામાં આવ્યાં છે. બંને વિમાનોનો કાટમાળ પોટોમેક નદીમાં છે.
4 લોકોને જીવતા બહાર કઢાયા
વોશિંગ્ટન પોસ્ટ અનુસાર, પાણીમાંથી અનેક મૃતદેહો મળી આવ્યા છે. દરમિયાન, NBCએ અહેવાલ આપ્યો કે પોટોમેક નદીમાંથી ચાર લોકોને જીવતા બચાવી લેવામાં આવ્યા છે.યુએસ વ્હાઇટ હાઉસના પ્રવક્તા કેરોલિન લેવિટે જણાવ્યું હતું કે રાષ્ટ્રપતિ ટ્રમ્પને અકસ્માત અંગે માહિતી આપવામાં આવી છે. ટ્રમ્પ સતત આના પર નજર રાખી રહ્યા છે. ટ્રમ્પે લોકોને શાંત રહેવા કહ્યું છે અને અધિકારીઓને બચાવ કામગીરી હાથ ધરવા જણાવ્યું છે.ઉપરાષ્ટ્રપતિ જેડી વાન્સે અકસ્માત પર દુઃખ વ્યક્ત કર્યું છે. વાન્સે નાગરિકોને અકસ્માતમાં ભોગ બનેલા લોકો માટે પ્રાર્થના કરવા વિનંતી કરી હતી.
સીએનએન અનુસાર, લોકોને બચાવવા માટે પોટોમેક નદીમાં ગોતાખોરોને ઉતારાયા છે. રાષ્ટ્રીય હવામાન સેવા અનુસાર, વિમાન દુર્ઘટના પછી પાણીમાં બચી ગયેલા મુસાફરો માટે જોખમ હોઈ શકે છે. કારણ કે આજે રાજધાની વોશિંગ્ટનમાં તાપમાન શૂન્ય ડિગ્રીથી નીચે રહેશે. આમાં, આ લોકોને 20-30 મિનિટમાં હાયપોથર્મિયા થઈ શકે છે.
કેન્સાસના સેનેટર રોજર માર્શલે X પર કહ્યું- મને હમણાં જ વોશિંગ્ટન ડીસી જતી વખતે વિમાન ક્રેશ થયું હોવાના અહેવાલો મળ્યા છે. અમે અધિકારીઓ સાથે સતત સંપર્કમાં છીએ. અમે દરેક મુસાફર અને તેમના પરિવારો માટે પ્રાર્થના કરીએ છીએ. હાલમાં જાનહાનિ વિશે કોઈ માહિતી નથી.
ફેડરલ એવિએશન એડમિનિસ્ટ્રેશન (FAA) અનુસાર, અમેરિકન એરલાઇન્સનું વિમાન રીગન નેશનલ એરપોર્ટ (DCA) પર રનવે 33ની નજીક આવી રહ્યું હતું ત્યારે તે બ્લેકહોક H-60 હેલિકોપ્ટર સાથે અથડાયું. અકસ્માતગ્રસ્ત વિમાન, CRJ700 બોમ્બાર્ડિયર વિમાન સ્થાનિક ફ્લાઇટ્સ માટે બનાવવામાં આવ્યું હતું અને તેમાં 68થી 73 મુસાફરો બેસી શકે છે.
અમેરિકાની રાજધાની વોશિંગ્ટન ડીસીમાં એક વિમાન અને બ્લેકહોક હેલિકોપ્ટર વચ્ચે થયેલી ટક્કરનો વીડિયો સોશિયલ મીડિયા પર વાઇરલ થઈ રહ્યો છે. આ વીડિયો અંગે લોકો વિવિધ પ્રકારના પ્રશ્નો ઉઠાવી રહ્યા છે. અનેક પ્રકારની કોન્સ્પિરસી થિયરી સામે આવી રહી છે. હવે રાષ્ટ્રપતિ ડોનાલ્ડ ટ્રમ્પે પોતે આ અંગે શંકા વ્યક્ત કરી છે.
વોશિંગ્ટન એરપોર્ટ નજીક બનેલી આ ઘટના અંગે અનેક કોન્સ્પિરસી થિયરી સામે આવી રહી છે. સોશિયલ મીડિયા પર એવું કહેવામાં આવી રહ્યું છે કે યુએસ આર્મીના હેલિકોપ્ટરે જાણી જોઈને વિમાનને ટક્કર મારી હતી. કેટલાક લોકો તેને આતંકવાદી ઘટના પણ કહી રહ્યા છે.
આ દરમિયાન ટ્રમ્પે સોશિયલ મીડિયા પર પોસ્ટ કરીને કહ્યું કે વિમાન એક નિશ્ચિત રૂટિન મુજબ રનવે તરફ આગળ વધી રહ્યું હતું. પણ અચાનક હેલિકોપ્ટર સીધું વિમાન તરફ આગળ વધવા લાગ્યું. આકાશ સ્વચ્છ હતું. વિમાનની લાઇટો પણ ચાલુ હતી. સામે વિમાન જોયા પછી પણ હેલિકોપ્ટરે રસ્તો કેમ ન બદલ્યો? કંટ્રોલ ટાવરે હેલિકોપ્ટર પાઇલટને કેમ જાણ ન કરી કે સામે એક વિમાન છે? આ દુર્ઘટના અટકાવવી જોઈતી હતી. તે સારું ન થયું.
તમને જણાવી દઈએ કે રીગન નેશનલ એરપોર્ટ પર, યુએસ આર્મીના બ્લેકહોક હેલિકોપ્ટરે અમેરિકન એરલાઇન્સના વિમાનને પાછળથી ટક્કર મારી હતી, ત્યારબાદ બંને નદીમાં પડી ગયાં હતાં. એરલાઇને પુષ્ટિ આપી છે કે અકસ્માત સમયે વિમાનમાં કુલ 64 લોકો સવાર હતા, જેમાં ચાર ક્રૂ સભ્યોનો પણ સમાવેશ થાય છે. જે સેનાનું હેલિકોપ્ટર અથડાયું તે તાલીમ ઉડાન હતું.
FBIએ આ મામલાની તપાસ શરૂ કરી
અમેરિકી તપાસ એજન્સી FBIએ પણ આ મામલાની તપાસ શરૂ કરી દીધી છે. FBIની વોશિંગ્ટન ફિલ્ડ ઓફિસ આ કેસમાં મદદ કરી રહી છે. અધિકારીઓએ તપાસ ચાલુ રહે ત્યાં સુધી તમામ પૂછપરછ માટે રાષ્ટ્રીય પરિવહન સલામતી બોર્ડને નિર્દેશ આપ્યો છે.