અમેરિકાના રાષ્ટ્રપતિ ડોનાલ્ડ ટ્રમ્પે ગુરુવારે ભારત પર 26% ટિટ-ફોર-ટેટ (પારસ્પરિક ટેરિફ) લાદવાની જાહેરાત કરી. તેમણે કહ્યું હતું- ભારત ખૂબ કડક છે. મોદી મારા સારા મિત્ર છે, પણ તેઓ અમારી સાથે સારો વ્યવહાર કરતા નથી.
ટ્રમ્પે કહ્યું- ભારત અમેરિકા પર 52% સુધીનો ટેરિફ લાદે છે, તેથી અમેરિકા ભારત પર 26% ટેરિફ લાદશે. અમે અન્ય દેશો પાસેથી લગભગ અડધા ટેરિફ વસૂલ કરીશું, જે તેઓ અમારી પાસેથી વસૂલ કરી રહ્યા છે, તેથી ટેરિફ સંપૂર્ણપણે પારસ્પરિક રહેશે નહીં. હું એ કરી શકતો હતો, પરંતુ ઘણા દેશો માટે એ મુશ્કેલ હોત. અમે આ કરવા માગતા ન હતા.
ભારત ઉપરાંત અમેરિકા ચીન પર 34%, યુરોપિયન યુનિયન પર 20%, દક્ષિણ કોરિયા પર 25%, જાપાન પર 24%, વિયેતનામ પર 46% અને તાઇવાન પર 32% ટેરિફ લાદશે. અમેરિકાએ લગભગ 60 દેશ પર અમેરિકન ઉત્પાદનો પર લાદવામાં આવતા ટેરિફના અડધા દરે ટેરિફ લાદ્યો છે.
ટ્રમ્પે કહ્યું હતું કે અમેરિકામાં આવતા તમામ માલ પર 10% બેઝલાઇન ટેરિફ લાદવામાં આવશે. વ્હાઇટ હાઉસના અધિકારીઓના જણાવ્યા અનુસાર, બેઝલાઇન ટેરિફ 5 એપ્રિલના રોજ રાત્રે 12:01 વાગ્યે લાગુ થશે. જ્યારે પારસ્પરિક (રેસિપ્રોકલ) ટેરિફ 9 એપ્રિલના રોજ રાત્રે 12:01 વાગ્યે લાગુ થશે. ટ્રમ્પે વ્હાઇટ હાઉસ રોઝ ગાર્ડનમાં મેક અમેરિકા વેલ્ધી અગેઇન કાર્યક્રમમાં રેસિપ્રોકલ ટેરિફની જાહેરાત કરી.
ટ્રમ્પના સંબોધનની 5 મોટી વાત:
- અમેરિકા ઓટો સેક્ટર પર 25% ટેરિફ લાદશે. અત્યારસુધી અમેરિકા અન્ય દેશોની મોટરસાઇકલ પર ફક્ત 2.4% ટેરિફ વસૂલતું હતું, જ્યારે ભારત 60%, વિયેતનામ 70%, 75% અને અન્ય દેશો એનાથી પણ વધુ કિંમતો વસૂલ કરી રહ્યા છે.
- અમેરિકા વિશ્વના અન્ય કોઈપણ દેશ કરતાં વધુ સમૃદ્ધ બનશે. આજે આપણે અમેરિકન કામદાર માટે ઊભા છીએ. અમે આખરે અમેરિકા ફર્સ્ટનો અમલ કરી રહ્યા છીએ. આપણે ખરેખર ખૂબ જ ધનવાન બની શકીએ છીએ. આપણે કદાચ એટલા ધનવાન હોઈએ છીએ કે અવિશ્વસનીય લાગે, પણ હવે આપણે વધુ સ્માર્ટ બની રહ્યા છીએ.
- અમેરિકા હવે ટેરિફના સંદર્ભમાં સમાન રીતે જવાબ આપશે. જે દેશો અમેરિકન બજારમાં પ્રવેશ ઇચ્છે છે તેમણે એની કિંમત ચૂકવવી પડશે. જો કોઈ કંપની ટેરિફમાંથી મુક્તિ ઇચ્છતી હોય તો તેણે અમેરિકામાં એનું ઉત્પાદન કરવું પડશે.
- ઘણા દેશોએ અમેરિકન બજારનો લાભ લઈને પોતાને ધનવાન બનાવ્યા, પરંતુ તેણે અમેરિકન માલ માટે તેનું બજાર કઠોર બનાવ્યું. હવે અમેરિકા પોતાના ફાયદા વિશે પણ વિચારશે. હવે અમેરિકામાં નોકરીઓ અને કારખાનાં પાછાં આવશે.
- આજે અમેરિકા માટે આર્થિક સ્વતંત્રતાનો દિવસ છે. આપણે અમેરિકાને ફરીથી મહાન બનાવવું પડશે. અમે પારસ્પરિક ટેરિફની જાહેરાત કરી રહ્યા છીએ, એટલે કે જે દેશ આપણા પર જે પણ ‘ટેરિફ લાદી રહ્યો છે, અમે તેમની સાથે પણ એવું જ કરીશું.’
ભારતે કંટ્રોલ રૂમ બનાવ્યો
ભારત સરકારે ટ્રમ્પની પારસ્પરિક ટેરિફ જાહેરાત પર નજર રાખવા માટે એક કંટ્રોલ રૂમ સ્થાપ્યો છે. વાણિજ્ય અને ઉદ્યોગ મંત્રાલયના અધિકારીઓ કંટ્રોલ રૂમમાં હાજર રહેશે. આ બધા ભારતના વેપાર પર યુએસ ટેરિફની સંભવિત અસરનું મૂલ્યાંકન કરશે.
મંગળવારે વ્હાઇટ હાઉસના પ્રેસ સેક્રેટરી કેરોલિન લેવિટે જણાવ્યું હતું કે ટેરિફની જાહેરાત થયા પછી તરત જ એનો અમલ કરવામાં આવશે. એ જ સમયે વ્હાઇટ હાઉસના સહાયક પીટર નાવારોએ દાવો કર્યો હતો કે ટેરિફ આગામી દાયકામાં $6 ટ્રિલિયનની આવક વધારશે.
ટ્રમ્પે 2 એપ્રિલને મુક્તિ દિવસ તરીકે નામ આપ્યું છે. આ દિવસથી તેઓ ભારત સહિત ઘણા અન્ય દેશો પર પારસ્પરિક ટેરિફ લાદવા જઈ રહ્યા છે.
ટેરિફ શું છે… ટેરિફ એ એક પ્રકારની બોર્ડર ફી અથવા ટેક્સ છે, જે કોઈપણ દેશ વિદેશથી આવતા માલ પર લાદે છે. આ કર આયાત કરતી કંપની પર લાદવામાં આવે છે. આમાં વધારો કે ઘટાડો કરીને દેશો એકબીજા સાથેના વેપારને નિયંત્રિત કરે છે.
ટ્રમ્પે કહ્યું હતું- 2 એપ્રિલથી ભારત પર 100% ટેરિફ લાદશે
અમેરિકન સંસદના સંયુક્ત સત્રમાં ટ્રમ્પે કહ્યું હતું કે ભારત અમારી પાસેથી 100%થી વધુ ટેરિફ વસૂલ કરે છે, અમે પણ આવતા મહિનાથી આવું જ કરવા જઈ રહ્યા છીએ. તેમણે જાહેરાત કરી કે તેમના વહીવટ હેઠળ જો કોઈ કંપની અમેરિકામાં પોતાનું ઉત્પાદન નહીં કરે, તો તેણે ટેરિફ ચૂકવવા પડશે. કેટલાક કિસ્સાઓમાં આ ટેરિફ ખૂબ મોટો હશે.
તેમણે કહ્યું હતું કે અન્ય દેશો અમેરિકા પર ભારે કર અને ટેરિફ લાદે છે, જ્યારે અમેરિકા તેમના પર ખૂબ જ ઓછા કરવેરા લાદે છે. આ ખૂબ જ અન્યાયી છે. બીજા દેશો દાયકાઓથી આપણા પર ટેરિફ લાદી રહ્યા છે, હવે આપણો વારો છે.
ટ્રમ્પે કહ્યું હતું કે ભારત અમારી પાસેથી ખૂબ ઊંચા ટેરિફ વસૂલ કરે છે
7 માર્ચે ટેરિફની જાહેરાત પછી ટ્રમ્પે કહ્યું હતું કે ભારત અમારી પાસેથી ખૂબ ઊંચા ટેરિફ વસૂલ કરે છે. તમે ભારતમાં કંઈપણ વેચી શકતા નથી, જોકે ભારત હવે તેના ટેરિફમાં નોંધપાત્ર ઘટાડો કરવા માગે છે, કારણ કે અમે તેનાં દુષ્કૃત્યોનો પર્દાફાશ કરી રહ્યા છીએ.
તેમણે કહ્યું- બધાએ આપણા દેશને લૂંટ્યો છે, પરંતુ હવે એ બંધ થઈ ગયું છે. મેં મારી પહેલી ટર્મ દરમિયાન એને બંધ કરાવી દીધું હતું. હવે આપણે આને સંપૂર્ણપણે બંધ કરીશું, કારણ કે આ ખૂબ જ ખોટું છે. અમેરિકાને આર્થિક, નાણાકીય અને વેપારી દૃષ્ટિકોણથી વિશ્વના લગભગ દરેક દેશે લૂંટ્યું છે.
અમેરિકન રાષ્ટ્રપતિનો મોટો દાવો, ભારત ટેરિફ ઘટાડવા સંમત થયું
દરમિયાન ટ્રમ્પે દાવો કર્યો હતો કે ભારતે અમેરિકન ઉત્પાદનો પર ટેરિફમાં નોંધપાત્ર ઘટાડો કરવાનો નિર્ણય લીધો છે. તેમણે કહ્યું હતું કે ઘણા દેશો તેમના ટેરિફ ઘટાડશે, કારણ કે તેમને ખ્યાલ છે કે તેઓ અમેરિકા સાથે ખોટા હતા. યુરોપિયન યુનિયન પહેલાંથી જ તેના ટેરિફ ઘટાડીને 2.5% કરી ચૂક્યું છે. મને તાજેતરમાં ખબર પડી કે ભારત પણ તેના ટેરિફમાં નોંધપાત્ર ઘટાડો કરવા જઈ રહ્યું છે.