મુંબઇ, ક્રિકેટ ચાહકો હંમેશા ભારત-પાકિસ્તાન મેચ ની આતુરતાથી રાહ જોતા હોય છે. ચાહકો ટૂંક સમયમાં આ બંને દેશોના ખેલાડીઓ વચ્ચે બીજી મેચ જોવાના છે. આ મેચ અમેરિકામાં રમાશે. આ મેચની તારીખ અને સ્થળની જાહેરાત કરવામાં આવી છે. આ મેચ ૨૪ ડિસેમ્બરે હ્યુસ્ટનના મોસેસ ક્રિકેટ સ્ટેડિયમમાં રમાશે.
અમેરિકામાં ૧૯ થી ૩૧ ડિસેમ્બર દરમિયાન યોજાનારી અમેરિકન પ્રીમિયર લીગ ટી ૨૦ ક્રિકેટ ટૂર્નામેન્ટની બીજી સિઝનનું શેડ્યૂલ જાહેર કરવામાં આવ્યું છે. આ ટૂર્નામેન્ટમાં ભારત અને પાકિસ્તાનના ખેલાડીઓ પણ સામસામે ટકરાશે. આ લીગમાં કુલ સાત ટીમો છે. આ લીગમાં ક્રિકેટ રમતા દેશોના નામની સાત ટીમો છે. આમાંથી એક પ્રીમિયમ ઈન્ડિયન્સ છે અને એક પ્રીમિયમ પાક. આ ઉપરાંત, ૫ ટીમો પ્રીમિયમ અફઘાન, પ્રીમિયમ અમેરિકન, પ્રીમિયમ ઓસીઝ, પ્રીમિયમ કેનેડિયન અને પ્રીમિયમ વેસ્ટ ઈન્ડિઝ છે.
ફાસ્ટ બોલર એસ શ્રીસંત અને ઓલરાઉન્ડર સ્ટુઅર્ટ બિન્ની પ્રીમિયમ ઈન્ડિયન્સ તરફથી રમતા જોવા મળશે, જ્યારે સોહેલ તનવીર, ફવાદ આલમ અને ઉસ્માન કાદિર પ્રીમિયમ પાકિસ્તાન ટીમ તરફથી રમતા જોવા મળશે. તમને જણાવી દઈએ કે આ લીગને આ વર્ષે મે મહિનામાં આઇસીસી દ્વારા મંજૂરી આપવામાં આવી હતી, ત્યારબાદ યુએએસ ક્રિકેટ બોર્ડે સાત ટીમો માટે ૪૦ આંતરરાષ્ટ્રીય ખેલાડીઓને કરાર બદ્ધ કર્યા છે.
અમેરિકન પ્રીમિયર લીગ ટી ૨૦ ક્રિકેટ ટુર્નામેન્ટના લીગ તબક્કામાં કુલ ૨૧ મેચો રમાશે. આ પછી, ટૂર્નામેન્ટની બંને સેમિ-ફાઇનલ મેચ ૩૦ ડિસેમ્બરે રમાશે અને ત્યારબાદ બીજી સિઝનની ફાઇનલ મેચ ૩૧ ડિસેમ્બરે રમાશે.